IPR Parliamentary Secy-i IPR ketdangsertem ajuru

Kohima, April 28 (TYO): Hokolbarnü Officer’s Conference Hall, DIPR nung Information & Public Relations (IPR) Parliamentary Secretary tasenba, Imtikumzuk-i IPR department ketdangsertem aser district ketdangsertem ajurua shisalemsatep sentong ka agiogo.
Iba sentong nung jembidang pai ketdangsertem aser department nung staff tem tsüngda amalitepa inyaktsüla, koba ajanga department atema langka tajung inyaktettsü aser talisa nüburtem tajungba tenzüktettsü, ta ashi.
Nüburtem nem osangtsüsang shitak agütsütsü atema department ji IPR asünungji department teinyaktsü tongoibangtibaji nüburtem tenzükba nung department-i iyakba osangtem mepang shitak nung etetdaktsütsüla, ta paisa ashi.
Paisa ketdangsertem aser staff tem dang mapang shitak nung office-i arutsüla aser nüburtem tajungtiba agi tenzüktsüla, kechiyong sorkar tetezü nüburtem tezükba lir, ta ashi.
Commissioner & Secretary, IPR, Wopen Lotha-ia, IPR department-i nüburtm tenzüka arudar, ta ashiba den külemi Parliamentary Secretary tasenbai department ketdangsertem aser staff tem nungita ajungtiba agi amalitepa inyaktsü imlar, ta metetdaktsü.
Iba sentong ya Director, IPR, Limawati Ao leniba nung agi aser Joint Director, Tokishe Sema-i department-i inyakba mapatem osang metetdakja liasü.