Baahubali 2-i mezüng anogo nung sen crore 100 dak tali aatet

Chennai, April 29 (Agencies) : S S Rajamouli-i direct asüba “Baahubali 2: The Conclusion” film India nung sayar mezüng anogo nung sen crore 100 aazükogo. India nunger film ka agi mezüng anogo nung sen timtiba aatetbaji iba film ya lir, ta senotsü ketdangsertemi ashi.
Film yanglur Karan Johar-ia dena iba film agi mezüng nung takok tulu anguba asoshi kanga pelaba metetdaktsü.
Trade analyst Taran Adarsh-i, iba film Hindi oshi agi meyipzükba agia sen crore 36.54 aatetogo, ta Honibarnü Taran-i tweet asü.
“Baahubali 2: The Conclusion” ya Telugu film lir aser iba film ya Tamil, Hindi aser Malayalam oshi tem nunga meyipzüka lir.
Hindi agi meyipzükba ji Karan Johar ajanga inyak aser pai, film takok aguba asoshi kanga pelar, ta ashi.
“Mezüng anogo nung bilema maliba aser pungmang nunga manguba takok nguogo…ibai otsüsütsü tajangzük….!!!” ta pai tweet asü.
Telugu oshi indang agi sen crore 53 aateta liasü, ta Trinath-i ashi.
“Iba film kanga junga lapoktetogo. State ana (Andhra aser Telangana) kija nung film mezüng asayanü sen timtiba aatetbaji iba film ya lir. Hopta tsüngda nung iba state ana nungi sen crore 100 dak tali aatettsü imlar,” ta pai ashi.
Tamil Nadu kija nunga mezüng anogo nung iba film yangi sen crore 12 tashi aatet.
“Hokolbarnü anepdang iba film sayutsü mathi asü nungbo iba dang nungi sen timba aateter lila. Hopta tsüngda nungbo ano talila aatettsü imlar,” ta Trinath-i ashi.
Hokolbarnüsa Kerala nunga kasa film agi sen srore 7 shi aatet.
US nunga Brihostibarnü kija nung sen dollar million 2.5 aatet.
Iba film nung Prabhas, Rana Daggubati, Anushka Shetty, Tamannaah Bhatia, Sathyaraj aser Ramya Krishnan nungeri tongti shilem agia lir.