Angami Students Union-i V&AH Directorate shibangtsür lungkak ait; Department-i Grade-IV mapa nung Imlikaba shimba agienogo

Kohima, August 17 (TYO) : Hombarnü Angami Students’ Union (ASU)-i Directorate of Veterinary & Animal Husbandry Department office shibangtsür lungkak ait.
July 17, 2015 nü District Veterinary & Animal Husbandry office, Kohima nung Grade-IV staff shimba mapa anenang ta state sorkar aser bangdak department nem takhangba agütsü saka parnoki ibaji magizükba ajanga tanü iba mapa inyaktsüsa akümer, ta ASU Tir Dievi Yano-i ashi.
ASU-i nisung kar anema iba ya inyakerba masü saka Kohima kübok aliba sorkar department balala nung lower grades aser talisa grade III aser IV mapa nung Kohima nung lisopur sensotem dang shimtsüla ta akhanger, kechiyong tanga district tem nunga kasa inyakyimji amshir, ta Yano-isa ashi.
Iba onük atema ASU-i tatembang anogoji August 13 asütsü ta latettsü saka iba anogo süiaka department aser sorkar nungi telangzüba kecha magütsü, ta paisa shisem.
July 30, 2015 nü ASU-i Director V&AH dangi züluba shidi nung Imlikaba ta ser Kohima district nung non-indigenous nisung ka shimba atema mepelaba aser anogo 15 tsüngda iba nisung mapa nungi agientsü aser iba onük atema olemteptsü shia liasü.
Hombar nikongtsütsü V&AH Parliamentary Secretary, S. Chuba-i ASU lennirtem aser Department ketdangsertem pa official chamber nung jaoker külem senden ka agiogo, ta Yano-isa osangbener dang ashi.
Iba senden nung Department ketdangsertemi ASU lennirtem dang Grade-IV mapa nung Imlikaba shimbaji agienogo aser tarutsü nung ibala mesükba inyakyim meinyaktsü ta nangzük, ta Yano-isa ashi.
Iba onük atema jungjunga olemtepba aser ano Parliamentary Secretary-i mepishiba sülen ASU lennirtemi department-i inyakba mapa pelashishia agizük aser V&AH Department anema lungkak aitba anentsü telemtetba agiogo, ta paisa metetdaktsü.