AAP MLA 34-i Kejriwal masü Vishwas ang Delhi CM aginer

New Delhi, April 29 (Agencies): Honibarnü Delhi BJP otongdar, Tajinder Pal S Bagga-i, Aam Aadmi Party MLA 34-i Arvind Kejriwal masü saka Kumar Vishwas ang Chief Minister shimdaktsüner, ta ashi.
Tamalena paisa, AAP MLA 34-i MCD election nung party-i tamakok ngura Delhi Chief Minister, Arvind Kejriwal pa menden nungi anendaktsüner, ta jembia liasü.
Delhi Municipal election nung AAP-i tamakok anguba sülen anogo asemnü lir BJP leniri twitter ajanga, AAP MLA 34-i Dr Kumar Vishwas Chief Minister südaktsüner ta osang angazükogo, ta metetdakja liasü.
Hokolbarnü AAP lenir, Kumar Vishwas-i, election nung tamakok anguba atema EVMs nem dang tai tongloktsübaji tai, April 23 nü Delhi municipal election nung tamakok anguba atema party-i tesülen meyipa reprangshitsü nüngdaker, ta jembia liasü.
“Ni kanga mepelar, kechiyong onoki trokbenbuba atonga tamakok nguogo. MCD election nung nüburtemi onok nem vote magütsübaji tejangja,” ta pai ashi.
“EVMs nem tai tongloktsübaji majung. Ibaji-a kuli ka asütsüa akok, aser iba atemaji benoka jembitsü, ajisüaka onoki vote agütsürtem anir marutet. Tamakok anguba atema party-i meyipa reprangshitsüla,” ta paisa ashi.