EVMs onük nung EC-i party ajak senden ayongtsü: Nasim

Chandigarh, April 29 (Agencies): Election Commission of India (ECI)-i yimtenren party ajak senden ka ayongtsü aser iba senden nung parnok dang electronic voting machines (EVMs) ji raksaa amshitsü makok aser timtem mali ta ashitsü, ta tanü Chief Election Commissioner, Nasim Zaidi-i metetdaktsü.
Paisa, nüburtem tamang koktettsü atema joka taruba nungibo Election Commission-i election ajak nung Voter-Verified Paper Audit Trail (VVPAT) amshitsü tebilemba lir, ta metetdaktsü.
Chandigarh nung osangbenertem den jembidang Nazim-i, “Kobi melii onoki party ajak senden ka ayongtsü aser parnok dang EVMs ji raksaa amshitsü makok aser tamang katettsüsa lir ta ashitsü,” ta metetdaktsü.
Yimtenren party balalai EVMs ashishia, election nung ballot papers dang amshitsü atema akhangba dak sentakba nung pai item o jembiogo.
Tawa opposition party 16-i Election Commission of India ajurua pa dang, nüburtemi joko EVMs dak tamang makar, anungji ballot paper system amshitsüla, ta takhangba agüja liasü.
CEC-isa, taruba election tem nungbo VVPAT machines amshitsü atema itemji alizüktsü asoshi inyakdar, ta metetdaktsü.
“VVPAT alitsü atema onoki senotsü ajak nguogo. VVPAT lakh 15 den PSUs ana Bharat Electronics Limited (BEL) aser Electronic Corporation of India (ECI) alitsü atema onoki mangaogo,” ta paisa ashi.
2018 küm September ita tashi nungbo VVPAT machines lakh 15 renemer alitsü, ta pai ashi.
Polling station ajak nung VVPAT amshiba mezüngbuba linükji India asütsü, aser ibaji ajanga voter agütsürtemi tali mulunglemtettsü, ta paisa shisem.
EVM nung nisung kati vote agütsüba sülen VVPAT nungjagi ‘receipt’ ka alutsü, aser ibaji ajanga pai melungba candidate nem vote shitak agütsüba jangjatsü.
Taküm Uttar Pradesh, Uttarakhand, Goa, Punjab aser Manipur state tem nung assembly election agiba sülen AAP tongti aser Delhi Chief Minister, Arvind Kejriwal, BSP lenir, Mayawati aser Samajwadi Party tongti, Akhilesh Yadav nunger densema yimtenren party aikati EVM anema ola adokogo.