Bhutan-i BBIN magizükteter

Kathmandu/Thimphu, April 29 (Agencies) : Bhutan-i Bangladesh, Bhutan, India, Nepal (BBIN) gari tenangzüktep (Motor Vehicle Agreement) magizükteter aser tanüngba linük asem dang parnok meteni iba maparen tenzükang ta ashiba ajanga item linüktem koda masü kümdaktsür, ta osangbenertemi ashi.
Bhutan-i iba osang ya Delhi nung aliba Nepal Embassy dang metetdaktsü aser iba osangji ano Foreign Ministry nem memetetdaktsü, ta Kathmandu osangkaket nung shia lir.
Bhutan-i iba amalitep mapa toktsütsü lemtetba ajanga anünga aliba linük asemi iba mapa kodaser takok angutsü ibaji atema lenmang kar patettsü nüngdak. Ano iba maparen atema olemtep kecha magi lir, ta Foreign Ministry nung ketdangser tain kati ashi.
“Ibai mapa akümtsü asoshi Bhutan meteni linük asem senteper telemtetba ka agitsü. Iba telemtetba agitsü asoshi India-i anitsüla,” ta ketdangser jagisa ashi.
Yaküm June ita tatemlen Bhutan yimtiba Thimphu nung South Asia linük pezüi BBIN tenangzüktep nung sign asü. Iba mesükba inyakyim ya South Asia nung ibai mezüngbuba lir. Iba tenangzüktep ajanga passenger, nija aser osettsüset abenba gari tem linük pezü prong nung senzütsü temelaba agütsür.
Aji oda süaka, Bhutan ya linük tila asüba yong iba inyakyim nung tera timtem alutsü ta ashir.
Parliament-i agizükba sülen Bhutan-a iba telok nung adentsü, ta Bhutan osang ajanga ashi.
Sorkari BBIN ya sabang ka amai agir. Iba sabang nung tashi, shishilemba, osangtsüsang, tongtepratep aser technology dena lir.
Linük tanga den amalitepa inyakba tsütsü sendaktepba akümbaji Bhutan asoshi kanga tongtibang mapa ka lir, anungji Bhutan sorkari BBIN aser BBIN gari tenangzüktep asoshi teinyaktsü ka lir ta agir, ta Bhutan Foreign Ministry-i ashi.
Linük asemibo iba tenangzüktep agizükogo, saka Bhutan-bo tangang iba mapa asoshi par linük sasep nung teinyaktepdak lir aser par soakari linük asemi nüngdakba ataloktsütsü merangdar.
Iba tenangzüktep asoshi aruyaa aliba Parliament senden nung jembitsü. Opposition-ibo iba tenangzüktep menungiter, ta osang ajanga ashi.
Ajisüaka Parliament-i iba tenangzüktep magizükra Bhutan rongsenkettsüng tsütsü maongka tajung magitettsü, ta sorkari ashir.
BBIN ya 2015 küm tsüngküm mapang mezüngsüa National Assembly, Bhutan nung benok, ajisüaka 2016 meyi mapang tashi thinen.
Ajisüaka ano 2016 November ita nung National Council-i iba inyakyim züktokadok.
National Council telemtetbaji Bhutan nunger kangabo shia memetetertemi kanga sashia nungita liasü.