5buba Frolic Cup 2017 KSU-i benogo

Tanü tembangba Frolic Cup 2017 asayamung nung takok angur telok, Khanakhurü Students’ Union den asayamung ketdangsertem külemi tangokba noksa yangi angur. Parnoki final asaya nung 1-0 agi Kuki Youth Club madak takok angu. 

Dimapur, April 29 (TYO) : Tanü tembangba, 5buba Frilic Cup 2017 asayamung nung Khanakhurü Students’ Union-i takok marok nguogo aser parnok sülen Kuki Youth Club-i tanabuba jenjang nung takok angu, ta Frolic Club Tir, Kepe Nakhro aser Games & Sports Secretary Nizhalhu Kuotsu nati sangdong ka ajanga metetdaktsü.
Iba telok ana ya tesüiba mapang iba asayamung nung asem tashi asayaogo.
Tenati ashiba agi, tanü anü kanga tatsü süaka Local Ground, Medziphema nung football jangrartem jenti nikongdang 3:00 ako shitak nung adenshia iba final asaya repranga liasü.
Internet ajanga osang abener, Kaminlen-i ashiba agi, menur arurtembo tamentsü tesem maliasü anungji asaya tepiyong nokdaker reprang aser asaya tenzükli nungi telok ana pusemertem ola tulu adoka jangrabangra reprangtep.
Kasa sangdong nung, asaya tenzükli nungi tajangshiba aika aliba telok, KSU-i ball kanga junga azüoka asaya meso ase par telok nungi Rhitso asaya mezüng tesadang atemtsü anasa mezüng goal yok. Tanabuba tesadang nungbo KYCB-ia kanga junga asaya aser vall parnok ket nung dak timba amshi, ta shia lir.
KYC-i mapang aika nung goal yoktsü maongka tajung nguteta liasü. Parnoki corner aser free kick aika anguba saka goal aika terara agi meyokteti lia asaya tembang. Anungji iba final asaya nung KSU-i 1-0 agi takok ngua asayamung takok marok angu, ta sangdong ajanga ashi.
Sangdong ajangsa ashiba agi, tan asayamung nung takok angur telok nem senpet, sen 60,000 den kuli kakettem aser tanabuba jenjang nung takok angurtem nem sen 30,000 senpet den kuli kakettem agütsü. Asayamung tepiyong nung Best midfielder, Khanakhurü Students’ Union nungi Ninja; Best Defender, Molvom Youth & Students’ Union nungi Temjenwati; Golden Gloves, Kuki Youth Club nungi Alemse; Golden Boot, Medziphema Village Youth Organisation nungi Shürhuosül aser Player of the Tournament, Kuki Youth Club nungi Nyithung nunger nema senpet aser kuli kakettem agütsü.
Takokertem nem senpet ajak Tongti tesemdanger Dimapur DC, Kesonyü Yhome-i lemtsü. Dimapur DC-i Frolic Club, Medziphema ajanga nisung ajak sabang kati anir arua kanga meranga aser bendanga inyakba asoshi tayongertem nem tenüngsang agütsü.
Kesonyü Yhome-i, tarutsü mapang nunga takok angutsü asoshi maneni asaya yimya tajung tang amai benshitsüla, ta asayartem ayonga liasü.