DDLSA, SAKHI-i Legal awareness sentong ka katsü

Dimapur, April 29 (TYO): April 29, 2017 nü Lotha Hoho-Ki, Dimapur nung Dimapur District Legal Services Authority (DDLSA) den SAKHI-One Stop Centre (OSC) senteper Lotha Eloe Ekhung atema anogo ka Legal awareness sentong katsüogo.
Okila jembidang Principal District aser Session Judge & Chairman, DDLSA, GH Ramlia-i lokti nung tajemzükba tia nung alirtem atema item ama programme katsütsüji kanga tongtibang, ta metetdaktsü.
Ramlia-isa, lokti nung tetsürtemi tongtibang shilem ka agir, ibayongji tetsürtemi parnok temetentem meteta alitsüla, koba ajanga parnoka teburtem den liromema akumtsü, ta ashi.
Ano Case Worker, SAKHI-OSC, Bovili K Chishi-ia OSC temzüngtem aser teinyaktsü shilemtem onük nung jembia liasü.
Lai ashiba agi, tetsürtem anema inyakba mapa balala ajanga takoksa anguba tetsürtem temang aser shisatsü anepalutsü atema Centre-i inyaker.
Anti-human trafficking/ NALSA Schemes indang metetdaktsüdang Panel Lawyer DDLSA, Moatila Ao-i, Victims of Trafficking and Commercial Sexual Exploitation Scheme, 2015 tongtibangba nükjidongji nisung shibelenba aser azüabongba tsütsü tim mesüi inyakba anema legal teyari agütsütsü atema lir, aser iba scheme yagi tanur ajak, aiür chanutem aser tetsür ajak ayimjemer, ta metetdaktsü.
Kasa sentong nung DDLSA nungi Panel Lawyers- Zuchumbeni, Moatila Ao, Dzuvino Chadi, Rokovitsu aser Zacharia Tetseo nungeria Women Right/ Domestic Violence Act, Consumer Protection Act, RTI aser Lok Adalat/ welfare schemes onüktem nung jembia liasü.
Shisa lemsatepdang CJM aser Secretary, DDLSA, Ajongba Imchen-i shilem agirtemi metetnüa asüngdangbatem langzüa liasü.
Tanü sentong nung Lotha Eloe Ekhung Tir, Sungsabeni-i lokti pelaa agizük.
Iba sentong ya panel lawyer, Sentimenla leniba nung agia liasü.