Manipur nung bomb 2 apok; Yimdaklir 2 kahset

Imphal, April 29 (Agencies): Honibarnep Manipur nung telungpurtemi Border Security Force (BSF) telok ka bomb amshia amak saka iba lendong nung tasüba mesüra yiruba maliasü.
Tanep 7:00 ako meta mejangjatetba telungpurtemi Imphal east district kübok Nongren yimtsüng nung BSF camp ka anasa bomb pokdaktsü.
Iba lendong atalokba sülen state aser central force temi telungpurtem aputsü atema mita aotsü tenzükogo.
Ano, tanü Churachandpur district kübok Behang boundary pillar anasa Silshi yimtsüng nung bomb ka apok.
Iba lendong nunga tasüba mesüra yiruba kecha maliasü aser sepai talila mapa lemzüktsüogo, ta police-i metetdaktsü.
Maneni, tanü Churachandpur district kübok international border anasa telungpurtemi sepaitem amak aser idangji khatepdang yimdaklir ana khaset.
Telungpurtemi Behang yimtsüng nungi mapa inyaker pezü pua anir ao. Sepaitemji tzü abenba gari ka meiner aodang telungpurtemi parnok len tom nung amak. Telungpur o sepai tsüngda khatepdang yimdaklir ana tiyong nung lia khaset, ta police-i metetdaktsü.