Assam nungi keyi 6 Buxa Tiger Reserve-i bener aotsü

Guwahati, April 20 (Agencies): North Bengal nung aliba Buxa Tiger Reserve (BTR) nung keyi nütsüng timba kümdaktsütsü nükjitong nung Assam nungi keyi 6 bener aotsü aser iba sentong ya National Tiger Conservation Authority (NTCA) ajanga molungogo.
“Buxa nung keyi timba kümdaktsütsü sentong ya NTCA indang technical committee ajanga agizükogo,” ta state Chief Wildlife Warden, Pradeep Vyas-i osangbener dang ashi.
“Assam nungi keyi tepong ana aser tetsü pezü BTR-i bener aotsü,” ta pai ashi.
Item keyi tem ya koba mapang bener aotsü, ta asüngdang dang, “Iba mapa ya taküm sa inyaktsü” ta pai langzü. Item keyi trok ya tayimtsü nung bener aotsü aser tesem melenshiba nung yimya sübadaktsütsü asoshi anogo 7 shibanga ketdangsertemi mita repranger BTR nung inoktsütsü. BTR nung keyi asem lir ta forest department ajanga shiaka mapang talangka iba tesem nung keyi aliba tejangja kuli monguteti lir. BTR ya Jalpaiguri district kübok Alipurduar sub-division nung lir.
Forest department ajanga Buxar-Jaldapara tesem nung keyi nütsüng timba kümdaktsütsü sentong tenzükba ya Wildlife Institute of India aser Global Tiger Forum den asüngdangtepa yanglu.
“Buxa nung keyi litettsüsa yanglushiogo aser parnok achiajemtsü asoshi sentong balala tenzükogo,” ta Vyas-i ashi. BTR nung nisung aliba indang tebilemtsü asüngdang dang, “Iba tesem nung aliba nisungtemi tesem melenshia tanga nung oa linüra, onoki teyari agütsütsü renema lir,” ta pai langzü.
Keyi ajanga nisungtem nem timtem agütsüba nungi kümzüka alitsü asoshi ‘special protection camp’ amenloka lir, ta Vyas-isa shisem. Iba tesem nung aliba nisungtem ya tesem balaka-i mao tashi Buxa nung keyi bener oa ayuba ajanga tajangzük magütsütsü, ta keyi indang shisadanger mongintemi ashir.
“Ozüng alema shiruru akhaba aser nisung libaliru ajanga keyi nütsüng tajemba kümdaktsüba ya menokdangtet tashi keyi tesem balaka-i bener oa yutsütsü ya tamakoktsü,” ta arem shiruru kümzüka ayutsü mapa inyaker, Belinda Wright-i osangbener dang ashi.
“Keyi kümzüka ayutsü asoshi mapa inyaker peria mali, ozüng alema shiruru tem moabu nung chiyungdaktsüba, arem mi, süng atsüngba aser nakmati atuba ajanga keyi nütsüng tajemba kümdaktsür,” ta Wildlife Protection Society of India nung Executive Director, Belinda-i ashi.
“Buxa nung keyi maliba kuli ya mezüng bushitsüla aser iba sülen ang keyi ya bener oa inoktsütsüla. Aji mesüra keyi bener oa yutsüba ji takoksa asütsü,” ta keyi taküm shisadanger, Valmik Thapar-ia ashi.