Badminton Asia Championships nung Chen Long-i gold angu

Wuhan (China), April 30 (Agencies) : Tang World no. 1 aser Olympic champion, Chen Long-i Deobarnü asayar mongin, Lin Dan madak 21-23, 21-11, 21-10 agi takok ngua pa asoshi Badminton Asia Championships nung mezüngbuba gold nguogo.
China rangben tebur kija asaya nung Chen-i meimlai ka asayar tajung ka madak takok angu, ta osangbenertemi ashi.
Mezüngbuba set asayadang asayar anaprongi kangsa junga asayatet aser iba set ji Lin Dan-i 23-21 agi akok. Aji süaka iba tamakok ajanga Chen-i temulung ajema mebilemi kanga meranga asayatsü tenzükba ajanga Lin-i aiben zükpeta liasü aser Chen-i set anaprongla kanga kara dang 21-11, 21-10 agi akok.
“Ibai ni asoshi Asia Championships 7buba lir aser ni gold medal nguogo. Gold medal angutsüji melarabo masü,” ta Chen-i ashi.
Tesüiba mapa iba asayamung nung Chen-i silver medal 3 aser bronze medal-a 3 ta ngua lir.
Ni tatemsabuba set ana nung junga masayatetba ajanga tanü iba tamakok angu, ta Lin-i asaya temer külen ashi.
“Aji oda süaka tan hopta ni kanga junga asayatetogo,” ta Lin-i shisem.
Honibarnü semifinal asaya nung Lin-i Malaysia nunger Lee Chong Wei madak set ana atonga takok ngu final asaya tashi atong.