9buba Open Basketball asayamung May 24 nü tenzüktsü

April 29, 2017 nü 9buba Basketball asayamung nung Convener Teisozhavi Theünuo aser Co-convener Medozhatuo Rutsa na den Suncity ketdangsertemi asayamung indang official logo amer tangokba noksa yangi angur.

Kohima, April 30 (TYO) : Küm ti tashi masayai aruba sülen, Suncity Club Kohima-i Honibarnü Nagaland nung akümket basketball asayamung tejen rongnung ka tanaben shia arudaktsüogo.
Iba 9buba open basketball asayamung ya Suncity Club Kohima aser Nagaland Basketball Association (NBA) na lokteper May 24 nungi 27, 2017 tashi Khouchiezie, Kohima Local Ground nung ayonga asayadaktsütsü.
Kohima yimtak aliba Suncity office nungi osangbenertem den jembiba mapang iba asayamung nung Co-convener, Medozhatuo Rutsa-i, tesüiba asayamung 8 ama mesüi tan asayamung yabo flood-lights kübok asayatsü, aser iba tesangwa kübok asayabaji tan mezüng asütsü. Iba asayamung nung state tesem balala nungi telok 20 tashii shilem agitsü imlar, ta ashi.
Iba den külemi iba asayamung ayongertemi iba asayamung asoshi sen lakh asem (3) tashi intoka basketball asayaba moapu yanglushidar.
Pai, tesüiba asayamung 8 tashi nung kidanger state tem nungia, Eastern Railways, Assam Regimental Centre , Shillong aser Faithballers Assam teloktem arua asayaa liasü, ajisüaka tan asayamung nungbo asaya ayongertemi state nung aliba asayartem tendanger amai tanga state tem nungi mejaoktsü, ta ashi.
2008 sülen kechiba iba asayamung anen ta asüngdang dang Rutsa-i, sen peria maliba ajanga anena ata, ta ashi.
“Iba asayamung ya onok sasa sen bendentepasa aka, kechiba süra Nagaland sorkar nungi teyari kecha mangu,” ta pai ashi.
State nung basketball asayaba jenjang tajungba küma terenlok bener arutsü asoshi iba asayamung tenzük nü Nagaland Basketball Referee’s Association (NBRA) tentetba angutsü, ta paisa ashi.
Pai ashiba agi, iba asayamung nung takok angurtem nem sen 50,000, tanabuba jenjang nung takok angur nem sen 30,000 senpettem den takok marok aser kuli kakettem agütsütsü. Semi final nung tamakok angur telok anaprongla nem sen meyirjang pungugu (5,000 each) senpet agütsütsü. Ano asayamung nung junga asayateter nema senpet agütsütsü aser asaya shia terepranger rongnungi tia takatiba/la nema ‘surprise gift hampers’ agütsütsü.
Iba asayamung Convener aser Nagaland Basketball Association (NBA) nung Tongti Tezülur, Teisozhavi Theünuo-i Club züngsemtem lia iba asayamung indang official logo sayatsü aser pai, iba asayamung ya Federation of International Basketball Association (FIBA) temzüng ozüng kübok asayatsü, ta metetdaktsü.
Asayamung nung shilem aginertemi May mezüng hopta tashi nung mobile no 9436016529 aser 8860054186 na nung osang agitepa tongteprateper tenüng agütsütsü asayamung ayongertemi metetdaktsür.