Director General Assam Rifles Chauhan-i Manipur semdang

Imphal, April 30 (Agencies): AVSM, YSM, SM, VSM, Director General Assam Rifles, Lieutenant General Shokin Chauhan-i anogo asemnü (April 28-30) HQ IGAR (South) semdanga Manipur-i arua lir, aser Major General Virendra Singh, VSM, Inspector General Assam Rifles (South)-i pa nem state tensa indang metetdakja liasü.
IGAR (South) leniba nung DGAR-i April 28, 2017 nü Manipur Angh, Dr. Najma Heptulla ajurua senden minute 40 shi amendang tenati state dak sendakba onük aika nung o lemtepa liasü.
Ano OORJA’ U-19 Football Talent Hunt Tournament 2017 tetenzük sentong nunga Chauhan tongti tesemdanger liasü.
Iba sentong nung jembidang DGAR-i, Assam Rifles-i Ato kilonser mangdang, football ajungkettsütsü aser Manipur nunger miim sempet sayatsü atema ‘Mission 11 Million’ inyaker, ta metetdaktsü.
April 29 nü DGAR-i IGAR (South) nung Assam Rifles veterans ajurua shisa lemsatepa liasü, aser iba mapang nung parnoki pa dang timtem onük balala metetdaktsü aser MHA-i parnok atema inyaktsüba mapatong balala indanga jembi.
April 30 nü DGAR-i Manipur Chief Minister, N Biren Singh-a ajuruogo, aser iba mapang nung pai CM den state dak sentakba tensa aser security onüktem nung o lemtepa liasü.