Raratsü atema India renema dang lir: Subramanian Swamy

New Delhi, May 01 (Agencies): Pakistan Army tongti, General Qamar Javed Bajwa-i Kashmir onük nung jembiba o meyipja Hombarnü Bharatiya Janata Party (BJP) lenir, Subramanian Swamy-i, Pakistan-i tiyongtsüi aita jangjongra parnok den raratsü atema India-i maongka bushidar, ta amokmeren.
“Parnok nem merangdakjang, onok renema lir, onoki meyiptsütsü, aser iba jagi Pakistan tatembang kati arutsü. Pakistan samatsütsü atema India meimer ajak renema lir,” ta Swamy-i osangbenertem dang ashi.
Swamy-isa, Islamabad-i komaka merangdir merangaka parnoki kodanga Kashmir ji India nungi mepiladaktsütettsü, ta ashi.
“Pakistan-i India den pezüben tashi raraogo aser ajak nungji parnoki tamakok angu. Parnoki jembiba oji ni mesükshir, kechiyong iba linük indangji onoki meteta lir, yangji sorkar mali. Parnoki kechi inyaknüdir inyaktsü akok, aser iba atemaji onoki atadar,” ta BJP lenirisa ashi.
Deobarnü Pakistan army tongti, Bajwa-i, par linüki Kashmir nungeri yimtenren atema rarabaji maneni nungittsü, ta ashi.
Paisa, India-i Kashmir nung kiralongra nungiter, ta aija liasü.