Kiralongra prokertem anema alima linüktemi longjemer inyaktsüla: Modi

New Delhi, May 01 (Agencies): Hombarnü Ato kilonser, Narendra Modi aser Turkey Tir, Recep Tayyip Erdogan na senden mena linük ana tsüngda security aser shishilembaba densema lenla balala nung tesendaktep jenjang reprangshia liasü, iba den külemi regional aser International onüktem nunga arok tangatetba lemsatepa liasü, ta osang ka ajanga metetdaktsü.
Kasa senden nung kiralongra anemba aser regional security nunga amalitepa inyakba jenjang reprangshia o lemtepogo.
Iba senden tembangba sülen osangbenertem senden nung külemi jembidang Ato kilonser, Modi-i, “Loktiliba nung anogoshia amokmeren tasen aser tayongzükba tasen aika ajuruba putu ka nung asenok lidar. Alima nung security tayongzükbatem ya arok tebilemtsü ka lir. Talisa, kiralongra ajanga amokmerenba atema asenoki tebilemtsü lemsateper. Ni iba onük nung Turkey Tir den senden menogo aser iba senden nung kiralongra anema raratsü künati bangjemogo,” ta metetdaktsü.
Ato kilonserisa, alima linüktemi külemi longjemer kiralongrartem networks aser parnok dangi senotsü aruba lenmangtem raksatsütsü aser arrtsü alema kiralongrartem senzüba nokdangtsüla, ta ashi.
“Alima linüktemisa kiralongra adokdaktsürtem, pusemertem, tejenokdak agütsürtem aser prokertem anema inyaktsüla,” ta paisa ashi.
“United Nations Security Council (UNSC)-i taoba aso masü saka tang 21buba aso nung alima tensa reprangshitsü nüngdak ta künati bangjemogo. India aser Turkey nüburtem akhidang nungi sobaliba aser oshioben nung tesendaktep lir,” ta paisa metetdaktsü.
Ano külen Turkey Tir, Erdogan-ia, kiralongra anema raraba nung par linüki India teti nungittsü, ta metetdaktsü.
“Kiralongrartemji parnoki tokshiba azü nung arakseta asütsü,” ta paisa ashi.
Turkey Tir yashi India tonga arua, aser tanü pa Rashtrapati Bhavan nung agizüka liasü. Iba sülen pai Raj Ghat semdanga Mahatma Gandhi nem akhüm agütsü.
Erdogan Tir akümba sülen tang mezüng pai bendang linük semdanger.