Changtongya Sub-div dept co-ordination forum senden amen

Changtongya (Mokokchung), May 01 (TYO): April 28, 2017 nü Changtongya Sub-Divisional Departmental Coordination Forum senden SDO (C) Office Chamber nung menogo.
Iba senden ya SDO (C) Chumlamo Humtsoe mendenbuba ser amen.
Iba senden nung züngsemtemi taoba senden nung telemtetbatem reprangshia liasü, iba den külemi April 24, 2017 nü mi lendong tatalokba nung takoksa angurtem nem SDDCF welfare fund nungi senotsü teyari agütsütsü atema lemteta liasü.
Mendenbuba-isa office ajak nung tekolakpurtem dang nüburtem tenzükba mapa nung pei teinyaktsü nendaka inyaktsü ajungshiba den külemi Officer In-charge danga jila nung police ajanga nüburtem nem security agütsütsü ajungshi.
Senden nungsa Town Hall ji public sentongtem nung dang amshitsü lemtetogo.
Senden nung züngsemtemi tang aliba BDO Quarter nung security sepaitem lemzüktsütsü atema lemtet.
Ano sorkar mapa inyaker ajaki SBI Mokokchung nung senotsü agizükdang timtem ajuruba dak sendakba nung Deputy Commissioner, Mokokchung dangi shidi ka zülutsü lemtetogo.
Ano senden nung züngsemtemi police point nung street light tsükloktsü atema Electrical Department nem mapa nungloktsü.
Senden nung o talangka lemtepba sülen Changtongya town nung Fire Brigade Station ka amenoktsü atema taruba DPDB (Mokokchung District Planning and Development Board) senden nung Mendenbuba ajanga benoktsü lemteta ayu.