Nagaland CM aser Angh nati Moatsü salem abener

Dimapur, May 1 (TYO): Nagaland Chief Minister, Dr. Shürhozelie Liezietsu-i Aor ajak den Moatsü benjung salem metetdaktsüogo.
Moatsü Mong ya metsü prokba sülen amunger aser iba benjung mapang nisungtem anibelema aruba sülen südoksünemtepa aser temang anisüngzüka kazür, ta chief minister-i sangdong ka nung ashi.
Benjungmung mapang tzübu merüktetba aser kiojentem yangluba aser yanglushiba mapang asenoki asen loktiliba nung teraksa alibatem meyipa reprangdangtsüla, Dr. Shürhozelie-isa ayongzük.
“Pioneer district ka asünung, Naga loktiliba renloktsü atema inyakba nung Aortemi shilem tulu agitsüla. Taküm Moatsü benjung nung Angami Public Organisation (APO) ajanga Angami nunger jaokba atema kanga pelar. Tanü nenoki medemer metsü prokba ajanga, kin ana tsüngda dang masü saka Naga nunger kin ajak atema asüng süngjang tajung atangtsü,” ta Dr. Shürhozelie-isa metetdaktsü.
Nagaland aser Arunachal Pradesh Angh, P.B Acharya-ia sangdong ka nung, Aor dangi Moatsu benjung salem metetdaktsüogo.
Aluyimertemji ‘annadata’ (chiyungtsü agütsürtem) lir aser parnoki asenok atema meranga inyaker. Asenoki aluyimertem bilemtetdi aser parnoki meranga inyakba atema pelar ta shidi, ta Angh-isa ashi.
Centre aser State sorkartemi aluyimertem atema soil testing, Kisan credit card, National Food Security Mission amala sentongtem atonga inyaker. Anungji, asenoki aluyimertem dang item welfare projects indang osang metetdaktsüdi aser parnok ajangzüktsü atema item teyari agitsü ajungmesodi, ta P.B Acharya-isa shisem.
“Ni aser kü kinungtsü Kavita Acharya nati Aor ajak den iba benjung mapang salem abener. Moatsü benjung ajanga Aor aser talisa Naga nunger nem yimjung, telongjem aser azükaru bener arujang ta moatsür” ta paisa metetdaktsü.