Japukong nung Election Merüka agitsü yimyim ayimoktsür

Dimapur, May 2 (TYO): Japukong nung aliba lokti tentet pungu- Japukong Arogo Toklang Tenzüker Telongjem, Japukong Senso Senden, Japukong Kaketshir Telongjem, Japukong Watsü Mongdang aser Japukong Youth Organization temi February 14, 2017 nü Aonokpu nung senden ka mena tzükong nung Election Merüka (Clean Election) agitsü yimyim agütsütsü lemtetba ama April 30, 2017 nung mezüng yimtsüng 10 semaa election merüka agitsü yimyim ayimoktsüogo.
Iba yimyim agütsütsü asoshi lokti ajak nungi teshimtet nübo 50 shi Longchem nung April 29 nü sentepa, Wb. Imtinungkum Lkr, Pastor Saring Baptist Arogo-i Clean Election terenemba aser teratet (documentary) renema aser tesayuba agütsü, ta tanü sangdong ka nung metetdaktsü.
April 30 anepdang 6:00 ako nungi tenzüka Wb. Wapang President JATTT ajanga lokti sarasadem ayonger, lenir Wb. Alemyapang Longchar SDO(C) Longchem ajanga tayongzükba agütsü aser temerük election wako salaja yimtsüngtemi telok 5 lemsar apuso.
Pai ashiba agi, North Korea ama nungbo kija temeten magütsür aser ibajagi pei aginüba lenir shimtsü makoker, saka asen India limabo Democracy asünung, kija shia pei temeden agütsür.
“Anungji asenoki sen yong asen temeden yoka mechii Pei lenir shimba nung ochishia election temzüngi melaba ama election agitsü yimyim agütsübaji sentong kanga junger” ta Wb. Alemyapang-i ayongzuk.
Iba tayongzükba nung lokti apusoa mezüng yimtsüng 10 sema jaja, yimtsüng shia nung kanga pelashishia agizüka taruba 2018 election ji merükteta agitsü asen tzükong nungi tenzüktsüla ta ajungshitepba liasu. Ano tanüngba yimtsüngtemji May 7, 2017 nung aotsü sarasadema atar, ta sangdong nungsa metetdaktsü.