Mongsenyimti Senso Kohima Union Golden Jubilee amung

Kohima, May 02 (TYO): May 02, 2017 nü Molu Ki, Merhulietsa, Kohima nung Mongsenyimti Senso Kohima Union (MSKU) küm 50 ajungba Golden Jubilee benjungmung sentong “Towarutem” omen nung ajemdaker mungogo, aser iba sentong nung tongti o jembirji, Vigilance & Anti Corruption Nagaland Director, I. Meyionen Jamir liasü.
Sentong nung Police Engineering Project Chief Engineer, P. Lanu Aier-i souvenir kaket ‘Towarutem’ sayatsü.
Onük jembidang Meyionen Jamir-i, MSUK küm 50 ajungba benjung ‘Towarutem’ omen nung ajemdaker amungbaji kanga tapet, ta metetdaktsü.
‘Towarutem’ olong teratet tongmelang agi, iba ya lokti aser alima ajungtsü atema inyakba mapang ka lir, ta pai ashi.
Paisa, iba ya taküm nung nisung ka kanga taginütsü mapang ka lir, kong nisung kati shisatsü peria ngur, taküm nung shisatsü aika ngur, aika ajangshir, senotsü nung yangerteter, tensa balala aika ajangshir aser tebilemtsü onük ajak koktettsüsa temelung lemteta aliba mapang ka, ta ashi.
Pai ashiba agi, lokti ka mesüra nija ka küm 50 ajungbaji, abensar ta ashitsü akok. “Züngya 50 ajanga tain akumba, tashi aketba aser taküm nung tabensa akumba sayur,” ta paisa ashi.
Iba ya peisasa bushidanga asadangtsü mapang ka, aser lokti ajungtsü atema mangdang tasen ayutsü mapang ka lir, ta pai metetdaktsü.
“Küm 50 abensar asünungji, asenok ya asen temeket nung atalalokbatem repranga dang atatsü mapang ka masü, saka temelenshi atema inyakertem asütsüla iba den külemi asen putu aser tarutsü putu ajungtsü atema inyakertem asütsüla,” ta pai ayongzük.
Ano Lanu Aier-ia, “Union tem ya nükjidong tajung yur tentetbatem lir, aser MSKU-i anema-alibaren, shisaliok aser mission mapatem nung lokti atema mapang tajung aika inyakogo,” ta metetdaktsü.
Paisa, mapa manguba tebilemtsü bentettsü asoshi infrastructure nüngdaker, aser ibaji asen lima nung yimjung aliba ajanga dang ataloktsü, ta ashi.
Nija sector temi sorkar sector tem ajangtetdar, ta shia pai lokti dang tarutsü nung skills development dak sendakba nung sentongtem ayongzüka katsütsü, aser ibaji ajanga lanurtem ajangzükdaktsütsü ajungshi.
Kasa sentong nung Langpangkong Senso Telongjem Kohima, Village Council Mongsenyimti aser Mongsenyimti Senso Bendang Union nungi züngsemtem den Dr. SI Tushi Ao-ia jembia liasü.
Iba sentong ya MSKU office ketdangpurtem leniba nung agi aser KABA Pastor, Rev. A. Chuba Jamir-i sarasadema liasü.
KMSST Convenor, Iminungla Longkumer leniba nung Union nung asürtem bilemteta teloki ola madoki asürtem nem akhüm agüja liasü.
Kasa sentong nung Zulutila Pongen-i ken ka aten aser Planning Committee Convenor, M. N. Ajungba Ozukum-i tepela anküp o jembia liasü. Iba sentong tembangba sülen asayamenü sentong liasü aser Jubilee mung chiyungtep.