Bangkok nung bomb apokba anasa Genelia aser Riteish na liasü

New Delhi, August 18 (Agencies) : Yasüng Bangkok yimti nung bomb apokba tesem anasa Bollywood actress Genelia D’Souza liasü aser lai Twitter ajanga ‘Onok junga lir’ ta metetdaktsüogo.
Tanep Genelia-i Twitter nung iba osang metetdaktsü. Yasüng bomb apokba sülena laisa Twitter nung Hindu tekülem ki anasa bomb ka apokba osang angashiogo ta metetdakja liasü.
“Onok aliba mall anasa bomb apok aser onoki police siren angashir. Onok junga dang lir aser tasürtem atema sasa bilemtsür” ta lai ashi.
Iba mapang Genelia aser kinungbo Riteish Deshmukh na külemi liasü Riteish-ia Instagram ajanga bomb apokba sülen ambulance ka arudang tangokba video sayu.
Arishi küm 28 tain Genelia ya Bangkok nung advertisement ka atema aoba lir.
Hombar nikongtsütsü Bangkok bomb lendong nung nisung 21 pokset aser 100 shi yirua lir.
Bangkok nung aliba Hindu tekülem kima bomb lendong atalokba sülen Thailand nung bushisüngdangertemi CCTV noksa tejangja ka nguogo, iba noksa nungji wakong sentsü tola ka sema alir tebur kati tekülem kima oset ka taleptsü nung toktsüba noksa lir.
BBC osang ka ajanga ashiba agi, CCTV noksa nungji nisungba jagi tesülen bena aliba yangkhuji tekülem ki telung nung kanga kümdanga ayuba sülen tekülem kiji toktsür aoer.
Iba noksa nung ajemdaker tang police-i iba nisungba noksa prokshiba den külemi pa bushi tenzükogo.
Yashi Bangkok nung aliba Hindu tekülem kidang bomb ana apokba lendong nung bendager nisung 9 densema tajemba agi nisung 21 süogo aser nisung 123 yiruogo.
Bendanger rongnung China nunger asem aser Hongkong nungi nisung ana densema liasü.
Ano tanga tatalokba ka nung Mongolbar nüa-a Bangkok nung tapoktsü ka pokdaktsü, saka iba lendong nung nisung shinga meyiru.
Nisungbaji “Thailand northeast nung sorkar anemer telok ka nungi züngsem südi ta mulung malemer, ta Thailand, junta tongti leniri ashi.
Mongolbar anepdang osangbenertem den jembidang Thailand Ato kilonseri, “Taoba mapang bomb tila teribo pokogo, saka tan yabo tai maketertem tepsettsü nükjidong nung pokdaktsüba lir. Parnoki asen rongsenkettsüng aser tourism jenjang raksatsüner,” ta ashi.
Ato kilonserisa, pai-a CCTV noksaji reprangogo aser melung melemi alisangji sorkari tekaraba nung aputsü meranger, ta ashi