Ao Senden aser APO tsüngda onük kar renem

Mokokchung, May 2 (TYO): Ao Senden (AS)-i Angami Public Organization (APO) jaoka 2017 Moatsü benjong amungba temaitsü kin ana telungjemi mulungtepa onük kar renema yuogo.
Onük renemba rongnung mezüngbubaji; ‘Onoki Naga nunger songjen asoshi yimjung, tesünep aser telungjem asoshi inyaktsü,’ ta Ao Senden o APO nati metetdaktsü.
Tanabuba nung, “Naga nunger telongjem asoshi kin ajak ajurua jembitsü aser asenok dak aketba tashimait shisatsü ajak endoker, pei dang meimba ama kiyonger dang meimtsü ashiba tanüla aser tangtetba nung Naga nunger tarutsü asoshi inyaktsü,” ta parnokisa metetdaktsü.
Tasembuba nung, “Naga nunger yirua aliba aneptsü aser renloka aotsü asoshi nüngdak tulutibaji telungjem asütsü,” ta AS aser APO natisa tangatetba ka metetdaktsü.
Pezübuba nung; Naga nunger ya ka dang, aser pei nisung rongnung yimjung apu alatsübaji mezüngbuba tongtibang mera ka asütsü, iba ama mapa ajanga dang Nagaland nung teti atema yimjung bener arutettsü, ta parnokisa ashi.
Pungububa nung; Naga yimten tensa tia ya temangmangtsüka kümogo, anungji Naga nunger kin ajaki iba tebilemtsü koktettsü asoshi shisatsü bendena akok tashi yariteptsüla ta Ao aser Angami nunger lenirtemi metetdaktsü.
Iba benjong amongba ya ajanga Aor o Angami nunger na dang masü saka Naga nunger ajak lungjemdaktsür ta parnokisa metetdaktsü.