Throttle Thrust II asayamong osang

Mokokchung, May 2 : “Throttle Thrust II” gari asemtepba sentong C. Apok Jamir, Parliamentary Secretary, Tourism, Government of Nagaland-i lapoktsüba mapang tangokba noksa nung angur.

Mokokchung, May 02 (TYO): Spearhead Motorsport Initiative ajanga “Throttle Thrust II” gari asemtepba sentong Mokokchung kübok Longmisa yimtsüng nung aliba Longrangdang tesem nung May 02 nü tenzük. Iba gari asemtepba sentong mezüng anogo nung telemsa ana nung shilem agir nisung 30 dak tali liasü. Iba sentong nung Parliamentary Secretary, Tourism, Government of Nagaland, C. Apok Jamir tongti tesemdanger asü.
“Gari asemtepba ya asaya kisüng masü saka iba sentong ajanga medemer timba yimteter aser adventure atema tanüla tuluba kümdaktsür, linük tasen nguteter aser sobaliba, tamangba yimsü balala nungi nisungtem ka küma longjemdaktsür,” ta C. Apok Jamir-i iba sentong nung jembidang ashi.
Linük tesem balala nungi iba tetoktepba nung shilem agitsü arur ajunga dang Tongti tesemdangeri pelaba lemsatep aser kin ajak tsüngda yimjung, tesunep aser tangatettep alitsü ajungshi.
Iba tetoktepba tenzüker tananübüba nung Longmisa yimtsüng indang ground nung Autocross telemsa indang final asayatsü.