Ungma nung Moatsü amung

Ungma, May 3 (TYO): Ungma Kosasanger Pusu Menden Impangi ayongzüka Moatsü tatembang sentong ka yangi Soyim Aonglenden nung longsotepa mungogo. Iba sentong nung Nagaland Additional Chief Secretary & Finance Commissioner, Wb. Temjen Toy tongti mungsemer ka ama arua benjong tali meraketdaktsü.
Temjen Toy-i mapang tatsüka agia jembidang, sobaliba ta kodang südir teti agia Ungma ya tama arur, Ungma nungeri sobaliba wazüka ayuba maparen jenti inyakba ngua pelaba metetdaktsü.
“Tanü kanga kara aoba putu ka nung mekümdangra asen sobaliba tajungtem ya samaa aotsü ana nung lir, anungji, Ungma nungeri anir lanurtem dang asen sobaliba takar ya meranga sayutsüla”, ta paisa tayongzükba ka agütsü.
Sentong nung Ungma Impang yimsüsürtemi anir telok balalai akhi asen tsürabur yimya nung sobaliba yar tsüngsang balala aiba den kenten menü tapu balala tena kanga longsotep aser tatem nung tetsür o tebur na tsüngda arr atsütepa iba benjong temenungratsüka tembang.