Moatsü ya tesendaktep aser yimjung yangluba mapang

Chuchuyimlang, May 3 (TYO): Chuchuyimlang yimdak küm shia Moatsü benjong munga arur, aji oda, taküma Moatsü sentong tajung ka Anü Mai Amphitheatre nung ayongzüka mungogo. Iba sentong nung Chuchuyimlang den kidanger Ao yim aser kishikinar kin balala nungi jaoka shilem balala agia kanga longsoa benjongtepogo.
Sentong nung Yaongyimchen yim (Phom), Moluyangpong Cultural Club Yaongyimsen, Chungliyimti yim (Sangtam), Yaongyimti New (Chang) aser Chuchuyimlang nung aliba National Institute of E-Learning & Information Technology nung azüngertem aser Medemsanger telok nungertemi akhi tetsü tebou yimya nung sobusolemtsü agir sobaliba kenten menü aser yar tsüngsang tapu balala ia sayuba ajanga benjongmungertem tzüratemdaktsü.
Iba sentong nung tongti tesemdanger Agriculture Production Commissioner, Commissioner & Secretary, Agriculture (Govt. of Nagaland), Wb. T. Imkonglemba IAS-i jembidang, Moatsü benjong ya takar-makar, tashir-mashir, tulu-tila ajak pelatepa amungba mapang, aser iba mapang ya temba-tinutem jaoka tesendaktep yanglushiba aser yimtsüngtem den yimjung yangluba mapang ka lir, ta ashi.
Benjongbentsü mapang yimtsüng balala den tesendaktep aser yimjung yangluba maparen ya jangratemtsü asen sobaliba maparen tajung ka lir, tang koda kidanger yimtsüngtem den putepa arudaki iba alenshitepba maparen ya maneni inyaktsüla, ta paisa lanu putu nem inyakdaktsünüba olen ka ashi. “Kati ka dang taoba ta agizüktepa alitsübaji koda tongtibang lir”, ta paisa shisem.
“Moatsü benjong shirnoki asüngteta amunger parnokji temoatsüba, saka shirnoki temenen chiyungtsü amshia aser konang bushia amunger parnokji temoatsü malitsü”, ta paisa ashi. Paisa ajemalua aser temoatsü meshia Moatsü benjong amungtsü asoshi tayongzükba ka agütsü.
Sentong nung Unger Village Council chairman Wb. Limasangba, Salulamang Village Council chairman Wb. Imyangluba, Kilengmen Village Council chairman Wb. S.Yanger parnoki Moatsü salem shia mapang tatsütsü agia liasü. CBC Assoc. Pastor Akangtemsüi sarasadema iba sentong tenzük. Chuchuyimlang Village Council Secretary Wb. Tsükjemtangiti tarur ajak pela agizükba o jembi aser Tourism Committee züngsem Wb. Meyiyapang Pongeneri tepela o shia iba sentong tembang.