Kolkata nung Diego Maradona aser Sourav Ganguly football asayatsü

Kolkata, May 03 (Agencies): FIFA U-17 asayatsü ita ka jelia lia Argentina nunger football asayar mongin, Diego Maradona September 18-19 nung India semdangtsü.
2008 December nung 1986 World Cup akoker, Maradona India-i aruba sülen tang agi tanabenbuba India semdanger asütsü.
“Iba sentong yangluba ya ni asoshi konang tulu lir. Kolkata ya tesem tajung ka lir aser küm aika tejaklen iba tesem semdangba indang otsü aika ni bilemteter,” ta Maradona-i video-conference ka ajanga iba sentong ayonger den jembidang ashi.
Pai iba tesem semdangba mapang September 19 nung taoba mapang India nunger cricket asayar captai, Sourav Ganguly den ‘charity match’ ka asayatsü.
“Iba dang ya ‘Match for Unity’ ta ajatsü aser iba asaya nung nisung 11 masayatsü. Maradona ya ajaki reprangtettsüsa sentong yanglutsü. Ganguly den nüngtugu nisungtem aika alitsü,” ta 7d Ventures aser Moksh Sports Venture, (Maradona India-i arutsü asoshi sentong yanglurtem) Founder, Satadru Dutta-i ashi.