America nungi China nunger agent tem aotsü shiogo

Washington, August 18 (Agencies): Obama-i aniba sorkari America nung China nungi ochi mashi mapa inyakertem jenoka aliba bushitsü asoshi China sorkar agent mima aita alirtem dang lendong süa lir linük tokjang ta ozüng agütsüogo, ta America ketdangsertemi ashi.
America ketdangsertemi ashiba agi Beijing ‘global campaign’ inyakyim dak sentakba maparen nung ajemdaker China nungi ochi mashi mapa inyakertem US nung jenoka alirtem bushia aputsü asoshi China sorkar agent tem ya linüki mima aitba lir.
China nungeri iba operation dang ‘Operation Fox Hunt’ ta ajar.
Tang America aser Beijing na aisü nung lenla mesütepi aliba mapang ka nung China sorkar meyong agent temi US nung parnok tera ulua bilema inyaksangshiba ajanga Washington nung mepelaba lemsatepba sülen America-i iba ozüng ya agütsüba lir.
US nung ketdangsertemi ashiba agi, item agent tem ya linük sorkar den angatetteper aitba masü saka tourist mesüra trade visa amer aita lir ta jangjaogo.
Item tai inyaker nisungtem bushidang agent tem yagi tashi onsara tali amshir. Parnoki US nung aliba China nunger kibongtem nung amokmerena jajaba osanga jangjaogo, ta ketdangsertemisa metetdaktsü.