France-i MH370 raksaba shilem bushiba anener

Paris, August 18 (Agencies):France ketdangsertemi Reunion asetkong, Indian Ocean nung anüng aser tzüyim telung nung Malaysia tayimtsü MH370 raksaba shilem hopta ka shi bushiba sülen joko iba bushiba anenogo, ta Mongolbar nü media ajanga ashi.
Aji oda süaka asetkong nung ketdangsertemi ashiba agi parnoki teti itanga alitsü, ta osang kar ajanga metetdaktsüogo.
July 29 nü tayimtsü meyong tashikang raksaba shilem mesükba ka angu aser Malaysian Ato Kilonser Najib Razak-i ibaji March 8, 2014 nü nisung 239 mener Beijing-i aoba tesamaba tayimtsü Boeing 777 meyong lir ta osang jangjatsüa liasü.
Item tayimtsü raksaba shilem ngutetba ajanga talangka kanga shisa bulua aliba aser angatettsü mokoki aliba ka jangjaba nung yaritsü. Mezüng tayimtsü raksaba shilem ka anguba sülen iba asetkong nung tesem sq.km 10,000 telungtet nung bushisüngdang mapa tenzüka liasü.
Aji oda süaka tang tashi nung iba bushisüngdang ajanga iba tayimtsü dak sentakba nung osang tejangja kecha monguteter, ta iba asetkong nung France ketdangser, Dominique Sorain-i sangdong ka ajanga metetdaktsüogo.