Northeast nung ango metsür timba akümtsü

Guwahati, May 04 (Agencies): Northeast (NE) nung aliba nüburtem rongnung shilem 95-i ango achir, saka NE tesemtem nung ango peria mangur. NE tesem nung tzü peria liaka ango metsüba ajema aliba ajanga tanga tesem nungi aika bener arur.
Scientist, ketdangser aser sorkar ajanga NE nung tzü peria aliba nung ‘open water fisheries’ lapoktsü asoshi sentong balala yangluba mapang lir. Central Inland Fisheries Research Institute (CIFRI) ajanga Guwahati nung senden ka tawa amenba mapang, NE nung metsütetba ango aki NE nüburtem peridaktsütsü asoshi state shia-i sentong tejangja yanglutsü jembitepa liasü.
Iba senden nung NE state tem nung aliba ‘fishery institutes’ aser fishery department nungi nisung 40 arua shilem agi.
CIFRI ajanga ashiba agi, 2015-16 küm NE nung ango Metric tonne (MT) 4,23,749 metsütet aser ibaji linük nung ango metsütetba nung shilem 4 lir. Item ango ya Assam nung MT 2,97,00, Tripura nung MT 68,331, Manipur nung MT 32,000, Nagaland nung MT 8,220, Mizoram nung MT 6,828, Meghalaya nung MT 6,560, Arunachal Pradesh nung MT 4,410 aser Sikkim nung MT 400 metsütet.
Tang NE tesemtem nung ango MT 4,82,384 nüngdaker aser iba nungi shilem 86 bo NE nung aliba agi peridaktsür.
Iba senden nung Assam Fisheries Minister, Parimal Suklabaidya densem aser NE nung metsütetba ango agi NE nüburtem peridaktsütsü asoshi Fishery Department tem külemi longjemer maparen ajak inyaktsüla, ta pai ashi. Assam sorkari ‘Ponds for all – fish for all’ scheme ajanga ‘blue revolution’ ka tenzükogo.
‘Open-water fisheries’ kisüng nungia NE nung ango ton 139,846 (ayongtem nungi ton 14,142, reservoir tem nungi ton 8,358, floodplain wetlands, awatsüng aser iba amala tesem nungi ton 117,346) adokdaktsütettsü südi, ta CIFRI ajanga ashir.