Sonia Gandhi-i Mulayam aser Lalu na den Tir election atema jembi

New Delhi, May 04 (Agencies): Taruba Tir election nung opposition party tem longjemer candidate ka shimtsü atema maparen tenzüka Congress Tir, Sonia Gandhi-i Samajwadi Party lenir, Mulayam Singh Yadav aser RJD tongti lenir, Lalu Prasad na den phone ajanga iba onük jembiogo.
Sonia Gandhi-isa Trinamool Congress aser West Bengal Chief Minister, Mamata Banerjee den Bahujan Samaj Party tongti, Mayawati nata ajurutsü sentong lir.
Congress tatong Tir, Rahul Gandhi-ia Samajwadi Party tongti lenir, Akhilesh Yadav ajurua Tir election atema jembiogo.
Yashi-a National Conference Working President aser taoba mapang Jammu & Kashmir Chief Minister, Omar Abdullah-i Sonia Gandhi lar kidang ajurua iba election atema jembiogo, ta party osang ka ajanga metetdaktsü.
Congress otongdar, Randeep Surjewala-i, “Onok tangatetba agibo, linük taginübaji tama südaktsütsüla, aser Tir den tatong Tir menden atema linük temzüngtem aser democracy wazüka yutettsüpur nisung ka shimtsüla,” ta metetdaktsü.
“Tir office akhümket wazüka yutettsüpur tasütait ka Tir shimtsüla. Linük taginübaji tama südaktsütsüla,” ta Congress otongdarisa ashi.
Taoba ita nunga Bihar Chief Minister/Janata Dal-United Tir, Nitish Kumar, Communist Party of India lenir, D Raja aser Communist Party of India-Marxist General Secretary, Sitaram Yechury nungeria Tir election onük nung Sonia ajuruogo.