Linük nung temerüktiba yimtiji Indore, memerüktibaji Gonda lir

New Delhi, May 04 (Agencies): India linük nung yimti 434 indang suvey agiba nungi temerüktiba yimtiji Indore shim aser memerüktiba yimtiji Uttar Pradesh nung Gonda yimti liasü.
Temerüktiba yimtitem tanabuba jenjang nung Bhopal, tasembuba jenjang nung Visakhapatnam aser jenjang pezübuba nung Surat yimti lir.
Iba tarensen nungsa Dimapur-a (Nagaland) jenjang 277 buba nung lir.
2015 küm iba tarensen mezüngbuba jenjang nung Mysuru yimti liasü saka takümbo iba yimti jenjang pungobuba nung ang adok, iba sülen jenjang trokbuba nung Tiruchirapally yimti aser tenetbuba nung New Delhi Municipal Council lir.
Iba osang ya tanü Urban development Union Minister, M Venkaiah Naidu-i sangdonga liasü.
Iba survey nung West Bengal nung aliba yimtitembo maden, kechiyong Chief Minister, Mamata Banerjee-i aniba sorkari Swachh Survekshan nung shilem magi.
Taküm küm iba tetoktepba nung item telemsa nungi repranga liasü: open defecation free, jana bendena intokba, shisaliok aser capacity building nung mark shilem 45, Field inspection nung mark shilem 25 aser sensotemi telangzüba agütsüba nung mark shilem 30 liasü.
Kasa survey ajanga ashiba agi, linük nung memerüktiba yimtitemji Uttar Pradesh nung yimti pezü, Bihar nung yimti ana, Punjab nung yimti ana aser Uttarakhand o Maharashtra na nungi yimti kaka liasü.