Kohima nung “Marriage Enrichment Retreat I & II” sentong agiogo

Kohima, May 04 (TYO) : April 28 nungi 30, 2017 tashi Don Bosco College, Kohima nung Marriage Enrichment Retreat I & II (MER I&II) sentong agiogo.
Kiyimba ajanga Tsüngremer sentong atalokba jung junga angatettsü aser tenüngsang agütsütsü asoshi ‘Marriage Enrichment Retreat’ ya amung aser iba sentong ya kibong kümer aliba amangbapurtem asoshi liasü.
Khristan kibong ka nung Tsüngrem sentong kanga jangja aser telungi ia angatettsü asoshi ibai Tsüngrem O angateta bushiba aser shisadangba mapang ka liasü. Iba sentong ajanga kibongtem Tsüngrem nem bendanga agüja pei taküm Pa asoshi tenlatsü maongka ngutet.
Kibong nung apuani na pei sasa asadangba, tena tsüngda tesendaktep, kibong jenjang asadangba aser Tsüngremi mulungba kibong ama Tsüngrem sentong nung alitsü asoshi bushidanga asadangtsü mapang nüngdaker. Apuani naprongi Tsüngrem nükjidong angateta Tsüngremer tajaba ataloktsütsü asoshi mapa agi inyaktsü mapang nüngdaker.
Apuanitemi Khristan den lungjemtsü aser sarasademtsü angazükba nung shilem agidakja parnok kibong tesendaktep tajungba küma Yisu Khrista dak amendaker Tanela Temeshi tashi nung liyonga aotsü nükjidong nung iba sentong agia liasü.
MER nung inyakyim balala ajanga kibongtem shilem balala agidakja tangazükba tajung agütsür aser iba mapang parnok nem Tsüngremer sentong nung alitsü angazükdaktsü.
Item inyakyim balalaji yamai:-
SARASADEMBA : Iba retreat nung apuani na nem kija aser lokti sarasademtsü mapang peria angütsü. Sarasademba ajanga Tsüngremer tajaba angateta tamang akangshidaktsür.
TESAYUBATEM : MER I nung onük tenet tashi liasü aser item rongnungji Khristan kiyimba asadanga kibong taküm bushidangba dena lir. Iba nung ya Laishiba dak ajemdaker tesayuba agütsüba dang masü saka anogo shia asen taküm nung nüngdakba tsütsü tesayuba jenti keta lir.
APUANI NA SENSAKSEM : O jembiba sülen kinungbo aser kinungtsü na sensaksem agidakja tena kibong nung kechi nüngdaka ali ibaji rasaa jembidaktsü.
SENTONG YANGLUBA : MER tatemlen apuani tem pei kibong sasep nung mener parnoki angazüka arubatem nungi jenjang koba agia mapa küma inyaka aotsü ibaji sensaksemdakja liasü.
FELLOWSHIP : Iba sentong nung shilem agiba kibongtem ajak sadok sadoka dendaktsütsü asoshi MER-i sentong tepiyong nung, balakata nikongdang aser pelatepa kazüba mapang sentong kanga junga yanglur kibongtem tsüngda sensaksemtsü mapang lapoktsü.
EUCHARIST : MER sentong tembangba mapang, Temeshi Tekülem agi. Iba tekümlem nung kibongtem shia pei kiyimdang nangzükba tanaben meyipa reprangshidaktsü aser pei sentongtem Tsüngrem nem bendanga agütsü.
Marriage Enrichment Retreat I onüktem aser tejembirtem;
Talk1. ‘Serving God through Christian marriage’ onük Catherine Kethokhrienuo-i jembi
Talk 2. ‘The Christian couple as a pastoral team’ onük Norbert Neikehetuo-i jembi
Talk 3. ‘The role of a Christian Husband’ Marcus Mengukhrietuo-i jembi
Talk 4. ‘The role of a Christian Wife’ Angela Kenei-ü-i jembi
Talk 5. ‘Effective communication in marriage’ Annabelle-i jembi
Talk 6. ‘Healing our marriages’ Vic Dela Torre-i jembi
Talk 7. ‘Building our homes for God’ Danny Abutas-i jembi
Marriage Enrichment Retreat II (MER 2) ya CFC nung keta aliba sentong lir. Ibai CFE kümnabuba nungi tenzüka shilem agir kibongtem ajak asoshi lir. Iba sentong nung züngsemtem nungi tedener tem dang adener saka unit lenir tem asoshibo tongtibang lir.
Marriage Enrichment Retreat II;
Talk1. ‘What makes a Christian marriage work’ ‘ Vic Dela Torre-i jembi
Talk2. ‘Unity in marriage’ ‘Annabelle-i jembi
Talk3. ‘Communication’ Salve Dela Torre-i jembi
Talk4. ‘Sex in marriage’ Danny Abutas-i jembi
Talk5. ‘Christian parenting’ Vic Dela Torre-i jembi
Talk6. ‘Empowering our marriage’ Danny Abutas-i jembi
Marriage Enrichment Retreat I & II atema Service Team tem nungji Bro Marcus Mengukhrietuo aser Sis Angela Kenei-ü na team lenirtem asü aser Sis Jeanne Asanuo, Bro Norbert Neikehetuo aser Sis Catherine Kethokhrienuo; Bro Alexander Kehouletuo & Sis Liza Kevilenuo, Bro Mathew Medo-o & Sis Catherine Khriengunuo nunger züngsemtem liasü