Bangkok bomb lendong agütsür tongtiba noksa nguogo

Bangkok, August, 18 : August 17, 2015 nü Bangkok, Thailand nung Erawan Shrine anasa bomb mapok tsüngda security camera agi nisung ka T-shirt wakong sentsü semer tangoka aliba noksa Royal Thai Police otongdar, Lt. Gen. Prawut Thavornsiri tema adoka nüburtem dang sayuogo. Prawut-i ashiba agi, noksa nung aliba nisung ya Hombar aonung nisung 20 poksetsang ta temulung melemi bilemer.

Bangkok, August 18 (Agencies): Thailand yimtiba Bangkok nung bomb lendong tulu agüja nisung 20 tashi taküm lalutsüba aser 125 yirutsüba nung tongti shilem agisang noksa ngutetogo. Iba noksa ya bomb mapok tsüngda security camera ajanga tangokba lir, ta Mongolbar nü police-i metetdaktsüogo.
Thailand Police tekolakba, Somyot Pumpunmuang-i, “Noksa nung nisung ka T-shirt wakong sentsü semer alibaji security camera ajanga bomb mapok tsüngda tangokba lir,” ta Mongolbar nü ashiba Bangkok Post ajanga metetdaktsü.
Hombar nikongdang Erawan Shrine nung improvised explosive device (IED) ka Ratchaprasong waitep tesem, Bangkok nung Brahma süngyanglu anasa nisung aika aliba mapang ka nung apok.
Noksa nung alisangji bomb mapok tsüngda shrine kima aliba menden ka nung yangkhu ka azüker mena angu aser pai iba tesem toktsü dang pai azüka aliba yangkhuji menden teküpok nung enoka yutsür ao. Iba sülen Soi Mahatlek Luang lenmang nung pai taxi motorcycle ka puita mener ao.
Ajisüaka police-i pa ya kechi nisung’ar ano osang tejangja magütsü.
Police-i tang Ratchaprasong waitep tesem nung aliba security camera tem nung tangoka aliba noksa aser video tem ajak reprangdanga bushisüngdangdar, ta Pumpunmuang-i ashi.
Tang nguteta aliba video aser noksa tem ‘Criminal Court’ nung sayuba sülen ang mulung melemi bilemba nisung aputsü temelaba angutsü, ta paisa ashi.