Class I nungi VIII tashi Hindi agitsü benokba SC-i magizük

New Delhi, May 04 (Agencies): State aser Union territory tem nung Class I nungi Class 8 tashi kaketshirtem ajak Hindi agitsü atema temepishiba ka benokba Supreme Court-i magizük.
BJP indang Delhi chapter otongdar, Ashwini Kumar Upadhyay-i benokba temepishibaji tanü Brihostibarnü Chief Justice of India, J S Khehar-i aniba bench kati angadanga liasü.
Iba bench nung züngsem anaji Justices D Y Chandrachud aser Sanjay Kishan Kaul na lir, aser bench-i, “Tanga oshi jembirtemia, kechiba parnok oshiji (sctool tem) nung mesayur ta asüngdangtsü. Iba onük atema sorkari inyaktsüla,” ta ashi.
Bench-isa Upadhyay dang, iba temepishibaji meyipa agiang, ta ashi.
“Onoki iba onük nung kecha mashitsü. Nai ibaji meyipa agiang,” ta ashi.
Temepishiba shidi nungji, “Karnataka, Andhra Pradesh aser Tamil Nadu ama Hindi oshi mejembiba state temi akhangba nung ajemdaker Parliament-i 1968 policy yanglua liasü, ajisüaka item state ajaki tanü tashi ‘three-language formula’ nung manidaker,” ta shia lir.
Hindi jembiba state tem nung, tamalen regional oshitem nung school/college azünger sorkar mapa inyakertem aser High court tem nung obendangertem atema Hindi oshi jembitsü, azüngtsü mesüra zülutsüji kanga tasak, iba yongji nüburtem junga metenzükteter, ta temepishiba shidi nungjisa shia liasü.