Shivpal Yadav-i party tasen sangdong

Lucknow, May 05 (Agencies): Samajwadi Party (SP) telung nung telemsa adoka aliba osang jangjaja Hokolbarnü Samajwadi Party lenir tain, Shivpal Singh Yadav-i, party tasen ka tentettsü aser party tasenbaji ‘Samajwadi Secular Morcha’ asütsü, ta sangdongogo.
Party National secretary ji Mulayam Singh Yadav asütsü, ta paisa metetdaktsü.
“Pa (Mulayam) akhümket asentenshitsü aser Samajwadis ajak longjemtsü atema Lucknow nung secular front party indang sangdongtsü,” ta Shivpal-i osangbenertem dang metetdaktsü.
Shivpal-isa iba dak sentakba nung state aser National level nung lenirtema ajurua jembitsü. Party tasenba nungji minorities, aluyimertem aser lanurtema dendaktsütsü.
Taoba ita Shivpal-i taoba Uttar Pradesh chief minister, Akhilesh Yadav dang Mulayam tanaben party tongti lenir kümdakjang ta mepishia liasü.
Shivpal-i, Akhilesh Yadav-i mezüngbuba nung party aser kibong longjemdaktsütsüla, ta ashi.
UP assembly election nung SP-i tamakok mejungi anguba atema Mulayam-i par jabaso, Akhilesh nem tai tonglokja liasü.
Iba election nung Samajwadi Party-i UP assembly menden 403 nungi menden 47 nung dang takok angu.