Nirbhaya ken o nung SC telemtetba pelaa agizüker: Maneka

New Delhi, May 05 (Agencies): 2012 küm Delhi nung tebur telok kati Nirbhaya tashiyim amshia raksatsür tepsetba ken o nung Hokolbarnü Supreme Court-i aibelener ajak nem tasüba temerenshi agütsütsü obendang agütsüba sülen Women & Child Development Union Minister, Maneka Gandhi-i SC telemtetba atema pela lemsatepogo.
Osangbener den jembidang Union Minister Maneka-i, “Tashiyim amshia taküm raksatsürtem nem Supreme Court-i tasüba temerenshi obendang agütsüba osang jangja-a ni pelar. Atangji iba tatalokba tu khenyongi ozüng alema inyakba mapa tamajung ka liasü,” ta ashi.
Lai ashiba agi, 2012 küm December 16 aonung bus ka nung tebur telok kati tashiyim amshia Nirbhaya raksatsür tepsetba osang ajanga linük nüburtem ajak aoksa, aser iba tatalokba sülen tashiyim amshia taküm raksatsüba ozüngtem nung temelenshi liasü.
“Aibelener pongububabo arishi küm nung tanur (juvenile) asüba ajanga chiokogo. Ozüng alema benshiba mapa tamajung aser Nirbhaya-i ajangshiba timtem ajanga tashiyim amshia raksatsüba dak sendakba ozüngtem tesashiba akum. Juvenile Justice Act nunga ‘juvenile’ kümji arishi küm 16 tashi ajema alu (tamalen arishi küm 18 liasü). Ibaji ajanga tarutsü nungbo aibelener timba pua arutettsü,” ta lai ashi.
Iba jenjang tashi tongtettsü atema judicial system-i küm pongu tashi agibaji mapang talangka lir, ta lai ashi.
“Ajisüaka India ozüng putiotsü nungbo ibaji mapang kanga tatsüka dang lir,” ta laisa shisem.