HP anentsüh lendong nung nisung 10 süogo

Manali, August 18 (Agencies): Mongolbar nikongdang 1:45 ako meta Himachal Pradesh, Kullu district kübok anentsüh alua lung tulu agi Gurudwara Manikaran Sahib raksatsüba lendong nung nisung 10 süogo aser nisung ter dak tema yiruogo, ta district ketdangsertemi ashi.
Kullu DC, Rakesh Kanwar-i, disaster management team ka lendong atalokba tesem jagi aoba sülen tasümang aser yirua alirtemji taxi ajanga Kullu-i anir ogo, ta ashi.
“Tasümang ter ngutetogo. Anentsüh agi nisung anenbanga ali asü mali’ar ibaji tama bushitsü. Gurudwara sülen tenem ajungaji anenzüka alutsüsa lir. Yaküm-a yangi anentsüh tera alua liasü,” ta ketdangser kati ashi.
Manikaran ya district headquarters Kullu nungi kilometer 45 shi pilar lir aser iba tesem ya Hindu aser Sikh tamangertem asoshi tamang ainlen jajaba tongti tesem ka lir. Küm shia Sikh nunger tamang ainlen jajar nisung merirjang aikati anogoshi Manikaran semdanger. Tesüiba küm 20 tsüngda Manikaran ya raliwalirtem asoshi tongti tesem ka kümogo aser kümshia raliwalir lakh pongui Manikaran semdanger.