Mapang agiaka ochi obendang agütsüogo: Nirbhaya tebu

New Delhi, May 05 (Agencies): 2012 küm December ita Delhi nung tebur telok kati bus nung Nirbhaya tashiyim amshia raksatsüba sülen la tepsetba ken o nung tanü Supreme Court-i aibelener pezü nem tasüba temerenshi agütsüba sülen Nirbhaya’er tsüraburtemi judiciary dang pelaba lemsatepogo.
“Mapang talangka agiaka ochi obendang agütsüogo, joko tangbo onok tesasaba kecha mali,” ta Nirbhaya tebu, Badri Singh-i ashi.
“Iba ya ozü kibong atema takok ka lir, iba obendang agi ni kanga pelar,” ta paisa ashi.
Ano Nirbhaya tetsüia, “Ozü jalai ochi obendang nguogo, ni judiciary dang pelar,” ta ashi.
Tanep Badri Singh-i, “Supereme Court-i ochi obendang agütsütsü ta ni tamang akar,” ta jembia liasü.
“Supreme Court jibo tokjang, item ama nisungjibo Tsüngremia tai matoktsü. Parnok nem tasüba temerenshi obendang agütsütsüla,” ta tanep pai jembia liasü.
“Aibelenertem nemji tasüba temerenshi agütsütsüla, ibaji magizüki malitsüla,” ta tanep Nirbhaya tetsü, Asha Devi-ia jembia liasü.
Laisa, “Onoki judicial dak tamang akar aser aibelenertem nem Supreme Court-i tasüba temerenshi obendang agütsütsü ta ni amanger. Supreme Court-i ozü jala nem ochi obendang agütsütsü ta ni amanger. Ibaji ajanga alima dang tansütsü sayutsü,” ta laisa ashi.