YNP-i ayonga Dimapur nung angati Medical Camp kaogo

Dimapur, May 05, 2017: Hokolbarnü Dimapur, half Nagarjan kiyong nung YNP-i ayongba angati medical camp nung Miss India Elite, Dr. Priyadarshini Bora-i shiranger ka temang tendangba noksa nung angur. Kasa noksa nungsa Naga beauty queen, Imlibenla-a angur.  

Dimapur, May 05 (TYO): Young Naga Personalities (YNP)-i ayongzüka tanü, May 05, 2017 nü tang Victor 1st NE Badminton Championship tasayadak tesem, half Nagarjan Indoor Badminton Stadium nung angati medical camp ka katsüogo.
Miss India Elite, Dr. Priyadarshini Boram ya doctor ka lir, la Guwahati nungi arua YNP-i ayongba medical camp nung shilem agia shiranger aika temang reprangtsüogo.
Dr. Priya-i, iba medical camp nung shilem agiba atema pelar, aser YNP-i ayongba free medical camp nung shilem agitsü atema Naga beauty queen, Imlibenla-i la dang asüngdangdang lai idangyongjisa molungsoa agizük, ta metetdaktsü.
Arishi küm 25, Dr. Priya-isa, lai lokti nung temelenshi atema inyakner, koba ajanga beauty queen dang masü saka nükjidong yur inyaker ka ta teratet taliba jangjatsür, ta metetdaktsü.
Tanü Medical camp nung tanur-tain aika temang tendangogo aser angati mozü lemja liasü. Iba dak alia tepu meyuba brush den tepu meyuba ‘gel’-a angati lemja liasü.
Dr. Priya dak alia kasa camp nung Temjennungsang Longchari (Indian Health Professional Award 2016 agizüksang; Best practicing dentist of the year), Dr.Tiatula Longkumer (MPT Neurology), Dr. Thungbemo Humtsoe MBBS, Dr. Kihoto DNB, surgery aser Dr. Abangdi Changkiri MBBS General Practitioner nungeria shilem agi.
2017 March ita nung tentetba YNP nung beauty queen, Imlibenla densema züngsem 19 lir, aser parnoki Futsal match; Penalty shoot out aser medical camp densema sentong balala aika ayongba ajanga lokti nung nisung aika ajangzükdar.
YNP züngsem, Vicato Aye-i, asüng züngsemtem lokti senden amentsü, aser iba senden nung Naga lokti tajangzük angutsü atema tebilemba onük aika benoka o lemteptsü, ta metetdaktsü.
YNP züngsemtem rongnung kentenertem, football asayartem, lokti atema inyakertem aser doctor tem densema lir.