UNTABA-i sorkar dang akhanger

Dimapur, May 5 (TYO): United Naga Tribes Association on Border Areas (UNTABA) mendenbuba Hukavi T. Yeputhomi-i anir ketdangpurtemi May 4, 2017 nü Chief Minister den ajurutepa senden ka amen.
Iba senden nung UNTABA-i Chief Minister nem Memorandum ka agütsüba nung, Naga nungeri Naga nunger lushi meyipa bener arutsü mapa inyakba ajanga Naga yimten mapa tenzük, anungji Nagaland aser Assam tsüngda arrtsü ken o ya yimten tebilemtsü lemtetdang angatetteptsü takhangba agütsü, ta UNTABA Joint Secretary, Ruchuyhun Keppen-i sangdong ka nung ashi.
Maneni, UNTABA-isa 1972, 1979 Interim Agreement tem aser Nagaland, Assam aser India sorkartem tsüngda MoU tem agitepa alibatem meyipa reprangshimtsü aser Naga nunger litsü nungi Disputed Area Belt (DAB) agientsü takhangba agütsü.
Peren nungi Mon district tashi Nagaland aser Assam den arrtsüa aliba tesemtem nung Assam den mesüra shinga dena mangatettep mali aser shingaia Naga nunger litsü nung DAB ama Naga nunger litsü mekazüka ayutsü makok, ta UNTABA-isa metetdaktsü.
Nagaland sorkari arrtsü tesemtem nung NAP mapa lemzüktsütsü aser arrtsü anasa aliba yimtsüng ajak nung Polling Station yem lapoktsü atema UNTABA-isa ayongzük.
Nagaland aser Assam tsüngda arrtsü ken o atema Chief Minister-i temulung agüja mapa inyakba atema kanga pelar, ta UNTABA-isa ashi.