Nirbhaya ken o nung tai tonglokja alirtem alensettsü

New Delhi, May 5 (Agencies): 2012 December ita Delhi nung arishi küm 23 tain tetsür kaketshir ka bus gari nung tashiyim agi raksatsüba aser reshikangba atema nisung pezü süngzü agi alensettsü tanü Supreme Court-i obendang agütsüogo.
Supreme Court nung obedangertemi tetsürlai, la tasütsü lia tatalokba osang metetdaktsüba indang kuli nung ammeter, ‘iba ken o nung aibelenertem ya tasüba agi merenshitsü dalang’ ta ashi.
Obendangertemi tapak 429 aliba osang agütsüba nung, “taochi mali”, “tesempatsü”, “meimchiri mebilemdangba” aser “shiruru mesük” ta asüba olungtem aiben tetshia lir.
Iba tetsürla dang temeimertemi “Nirbhaya” (tasütait) ta jaloktsü aser tanü lar tsüraburtema okadak lia obendang agütsü. Iba mapang okadak alirtemi teka madena obendangji pela agizük.
December 16, 2012 aonung physiotherapy azünger tetsürla aser lar medemer ka Delhi anüolentip tsütsü bus gari ka ayaketa tua amen. Ajisüaka, bus gari nungji tebur troki tetsürla tashiyim agi raksatsü aser reshikangshi asü. Iba lendong atalokba sülen anogo 13 lir külen, la Singapore mozüki ka nung asü.
Iba tatalokba sülen India nung dang masü saka bendang linüktem nung nisungtemi ola adoka lungkak ait aser 2013 nung trial court kati la dak tashiyim mapa inyakertem tasüba agi merenshitsü oshidang agütsü aser küm ka lir külen high court-ia ibaji pusema nungit. Saka, tai tongloktsürtem- Akshay Thakur, Vinay Sharma, Pawan Gupta aser Mukesh nungertemi Supreme Court nung taochi sayuang ta temepishiba ken o ka benok.
Okadaki obendang magütsüdang March 2013 nung bus gari anir Ram Singh bo tepuokdak soseta asü aser nisung trokbubaji, pa apuba mapang arishi küm 18 ano mejungi aliba ajanga ‘juvenile law’ kübok aitsü aser pa küm asem tashi correction home ka nung ayuba sülen December 2015 nü idak nungjagi chiokogo.
“Ni kanga pelar” ta tanü Nirbhaya tetsü Asha Devi-i ashi aser külen tebu BN Singh-ia “iba ya ozü kibong atema dang masü saka asen linük nung tetsür shiai takok anguba ka lir” ta osangbener dang ashi.
“Supreme Court-i dang masü, Tsüngremia item nisung dak tai matoktsü. Parnok nem tasüba temerenshi agütsütsüla” ta tanü obendang magütsüdang BN Singh-i osangbener dang shia lir.
Tanü Supreme Court-i süngzü agi alensettsü obendang agüjaka, tai tonglokja alir nisung pezüi SC obendanganema temepishiba ken o anaben aser presidential pardon khen meshitsü atema lenmang lir.