Ao arangtet tatidang tenyim balala nung nisung 91-i takok angu

Mokokchung, May 5 (TYO): 4 buba Ao Senden Literature Board (ASLB) Arangtet Tatidang takoker nem kulikaket agütsüba sentong tajung ka yangi Mokokchung Town Hall nung meraketa agiogo.
Taküm Post Graduate Diploma, B.A Diploma batch balala nung takoker ajak agi 91 liasü aser Ao Senden tir C. Angang Jamir aser ASLB mendenbuba Prof. A. Lanunungsang na ajanga takoker nem akhümketa kulikakettem amoktsüogo.
Iba den ano Jemtimenba Mollier Foundation (JMF)-i tenyim balala nung marks teimtiba angur nem JMF Award agütsü aser taküm iba senpetji; Post Graduate Diploma 2016 nung Nungshienla, B.A 2014 batch nung Meyalepden, B.A Diploma 2015 batch nung Easterna Supong, B.A Diploma (5 years) 2016 nung Asapokla Imsong aser B.A Diploma (3 years) 2016 nung A.Chubayanger Longkumer parnoki agizük.
Tanü iba sentong nung tongti tejaoker Clark Theological College Principal, Rev. Dr. Mar Pongeni jembidang, pei tetsü oshi meranga bushia zünger takok ngutetba ya tanga takoktem den medemdangtsü makok, iba yabo nai mezüng angazüka jembiba oshi nung takok anguba lir, anungji, takoker ajak nem tenüngsang agütsür, ta ashi.
“Oshioben aser kaketkeno bushiba aser meimba ajanga alima arakzüdaktsür, iba ajanga nisunger tashimetet aser tangatetbatem renloka kümdaktsür”, ta pai ashi. “Oshioben aser kaketkeno nungji tashi lir, kechiaser ibai nisungi memeteti aliba, mangashii aliba, tongtibang mesüi toktsüba, itemji metettsü, angashidaktsütsü aser tongtibang kümdaktsütsü tejangraba nung ajemdaker inyakba ka lir”, ta paisa shisem.
“Kaketkeno aser oshioben renlokba jagi kin ka aser nüburtem tejakleni aoba sayur. Kaketkeno züluba nung renlokba indang jembidang, pei tetsü oshi mesamadaktsütsüla aser ibai meimchir taküm ka asoshi tongtibangtiba lir”, ta pai ashi.
“Aor sürnung pei tetsü oshi mejembitetbaji maaksü tulu aser Ao o nung züluba kaket mezüngnübaji konang masü, anungji, tsüraburtemi chirnur dang item indang angateta kibok nung sayutsüla”, ta paisa tayongzükba ka agütsü.
“Tenyim balala nung degree/diploma ngur ajemajema alitsüba masü, saka nenoki anir Ao Senden Literature Board den amalitepa Ao kaketkeno aser oshioben renlokba nung shilem agitsüla”, ta paisa takokertem ayongzük.
Aor kaketkeno aser oshioben renlokba nung tongti shilem agia yarir tsürabur parnok 17 nem tetushi agütsü. Parnokji; M.D Akokba Jamir (Longsa), Chubatemsü Jamir (Süngratsü), Asür Sosangmeren (Ungma), Asür S Mongsen (Salulamang), Asür S. Bendang (Chungliyimsen), Asür T.Nokpang Jamir (Kelingmen), Asür Rev. Chujangneken (Chungtia), Asür Akum Kichu (Aliba), Asür Rev. L. Pona Jamir (Mopungchuket), Asür Obangtiba Pongen (Chuchuyimlang), Asür Rev. K. Lanumeren (Lakhuni), Asür Kilensowa (Mkg), P.Renthy Jamir (Ctn), Rev. M.Luen (Merangkong), Er. I.Shilu Yaden (Merangkong), Rev. Dr. T. Alemmeren (Mkg) aser Dr. Chubatola Aier (Waromung) nungertem liasü.
Iba den ano Ao oshi nung ken mejema küm 25 tashi nübur yariba ngua “Samaro” kentener telok nung züngsem Wati Jamir (Waromung), Sakutemsü (Khensa) aser Lima Imsong (Unger) parnok nema tetushi senpet agütsü.