PM Modi-i Bihar state dang sen crore lakh 1.25 nangzük

Arrah (Bihar), August 18, 2015: Mongolbar nü Arrah nung Ato kilonser Narendra Modi-i National Highway project 11 atema sangdongba sülen lokti dak teka ayiploktsüba noksa nung angur. Noksa nungsa Bihar Angh, Ram Nath Kovind aser Union Minister tem-a angur.

Arrah (Bihar), August 18 (Agencies): Tanü Ato kilonser Narendra Modi-i Assembly election agitsü aliba state, Bihar asoshi senotsü crore lakh 1.25 nangzükogo.
BJP-i Delhi assembly election nung tamakok kanga mejungi anguba sülen tang Bihar election nungbo takok tulu angutsü nükjidong nung inyaktepdagi.
Bihar assembly election atema Ato kilonser Modi-i tanü senden ana nung jembiogo.
Taoba anogo ananü Modi-i UAE linük semdanga liasü aser pa India-i meyipa aruba sülen ghonda ishika tsüngda pai Bihar nung Chief Minister Nitish Kumar aija jembiogo.
Modi-i ashiba agi, Kumar-i taoba UPA sorkar den tesentaktep yangluba ajanga sen crore 12,000 dang ngua liasü aser ibaji ajanga Bihar akhümket tsünglangleni alu.
Modi onük nung tongtibangtibaji Bihar nem senotsü teyari crore lakh 1.25 agütsütsü nangzükbaji liasü, aser iba tenangzükba nung ajemdaker pai Kumar aiben aija jembi.
“Kü tenangzükba akhümket ayutsü atema ni yangi lir. Ni tamalen sen crore 50,000 ta shiogo. Nenoki kwi aginer (?) crore 60,000 asü, crore 70,000 asü, crore 80 mesüra crore 90,0000 aginer (?) Ni nenok nem sen crore lakh 1.25 agütsütsü sangdonger. Bihar tia melenshitsütsü asoshi Delhi nung aliba sokrar (Centre)-i sen crore lakh 1.25 intoktsü,” ta Modi-i sangdong.
Pai ashiba agi, iba senotsü nungji tang Centre-i sen crore 40,000 agüja terenlok mapa teinyaktak senbo maden.
Bihar assembly election nung BJP-i aniba NDA nungi chief minister candidate tenüng sangdonga mali, ajisüaka party-i Ato kilonser tenüng nung tokteptsü, ta tamalen sangdonga lir.
Iba backward state atema election mapang nung senotsü teyari tenangzükba ya kanga tongtibang onük ka lir, aser state BJP lenirtemi vote angutsü asoshi iba tenangzükba nung kanga temelung alemer.
Taruba Bihar election asoshi Modi-i tanü jembiba densema ita ka tsüngda pai asemben nübo yima jembiogo.
Tanü Arrah nung ‘Parivartan Rally’ nung jembidang Modi-i, “BJP-i Bihar state ya BIMARU (tesülen atsüngzüka aliba) state tia nungi anitettsü ta ni sangdongba mapang asen Chief Minister kanga jashia liasü. Bihar ya joko BIMARU state ka masü ta pai shiogo. Ibaji shitak süra, ni tepelatiba asütsü. Ni ibaji pela agizüker,” ta ashi.
Kumar-i Centre dang nungi senotsü teyari meshiba dak sentakba nung Modi-i, “Ajisüaka iba ya kü dang langzüang, nisung ka temang anema lira pai doctor ka dangi aotsü asü. Nisung kar tepok sünga lira pai chiyungtsü bushia tangaleni aotsü asü (?) Külen pai Bihar ya BIMARU state ka masü ta jembir, saka ano külenbo pai langka mesüra langka meshir. Iba ya Bihar nüburtem nem lemtetdakjang,” ta ashi.
“Yimtenren nung tajangzük angutsü asoshi pai Bihar akhümket mejangjaba tia ka nung toktsü,” ta Modi-i ashi.
Taoba UPA sorkar dang nungi chiyungtsü tera ka angubaji masü saka paibo Bihar lenla ajak nung renloktsüner, ta Ato kilonseri ashi.
Tanep Patna Airport nung Kumar-i Modi agizüka liasü, saka Arrah nung Modi-i sen crore 9700 indang National Highway project 11 atema foundation azüngtsüba sentong nungba pa maden.
Modi-i aija jembiba dak sentakba nung Kumar-i, “Pai (Modi) amalitep federalism indang jembir, saka ibaji anema inyaker. Pai teti agi-a state sorkartem luja jembir aser tagitak maka ama sensaja jembir,” ta ashi.