Shiva aser Sumit-na Asian Boxing C’ship final tongogo

Tashkent, May 05 (Agencies): India nunger tesünteper seret 60 telemsa nung jenjang pezübuba nung alisang, Shiva Thapa aser seret 91 telemsa nung Sumit Sangwan-na Asian Boxing Championship final tongogo.
Semi-final nung Shiva-i Olympics nung bronze medal ngur alisang, Mongolia nungi Dorjnyambuug Otgondalai akok aser Sumit-i Tajik Jakhon Qurbonov madak takok angu.
Maneni seret 75 telemsa nung India nunger Vikas Krishna-i semi-final nung ‘walkover’ ajanga bronze medal nguogo aser Korea nunger Lee Dongyun final-i ai.
“Tanü (Hokulbar) ‘weigh-in’ nung Vikas Krishna maliasü, anungji pa den tsüngteptsü alisang South Korea nungba final-i ‘walkover’ süogo,” ta Asian Boxing Confederation sangdong ka nung ashi.
Iba tsüngtepba nung Vikas-i ‘walkover’ agütsüba küli tejangja iba osang züluba tashi nung agüja mali.
Shiva ya World Championship nung bronze medal ngua lir aser pai Asian Games nung tang Champion bena alisang, Mongolia nungba den tsüngtep. Semi-final nung China nunger Jun Shan akoksang, Uzbekistan nunger Elnur Abduraimov den Shiva final asayatsü.
Tesüsabuba Asian Championship 2015 nung India-i medal pezü ngua lir. Iba mapang Shiva-i India nunger asoshi silver medal ngutsü, L Devendro Singh (seret 52) aser Satish Kumar (seret +91) nati bronze ngua liasü.
India-i Asian Championship nung tesüsa gold medal ngua aliba ya Shiva-i 2013 küm angu aser iba mapang pa ‘bantamweight division’ nung asaya. Iba masüdang M Suranjoy Singh (seret 52)-i 2009 küm gold ngua lir.