US aser S. Korea nati linük lenir biochemical amshia tepsettsü merang:N. Korea

Washington, May 5 (Agencies) : North Korea-i, US aser South Korea linüktem nungi itdangitertemi linük lenir, Kim Jong-un biochemical (‘nano mim’ mesüra ‘radio active’) oset amshia tepset merang saka takok mongutet, ta aija ashi.
North Korea ministry of state security-i, CIA aser South Korea nung Intelligence Service (IS) nati tetsübutsü aketba mapa ka inyakogo. Parnok North Korea-i itdangitertsü asoshi aita ozü lenir tepsettsü merang, ta Hokolbarnü ashiba linük osangbenertem sangdong ka ajanga metetdaktsü.
Ministry-i, Russia nung aliba North Korea senso ka nem item itdangitertem yagi sübokrem agütsü aser pa linüki aruba sülen Kim tepsettsü asoshi shisatsü nung renemtsü, ta ashi.
Parnokisa ashiba agi, South Korea IS-i iba nisung nem sen aser satellite ajanga tongtepratepba oset peria agütsür Kim Jong-un telok senden nung adenba mapang biochemical oset amshia tepsettsü yok.
Ministry-i, aiben tongtepratepba aser sen jenti agütsüba sülen IS tem jagi North Korea nungba dangji taoba ita ang biochemical oset koba amshitsü ibaji CIA-i agütsütsü ashi, ta metetdaktsü.
Kechi kodaser iba sentong raksatsüsa akümar ibaji ashitsü makok mesüra iba sang tenüng komaser temai adoka metettsüsa aküm ibajia mejangja. Ajisüaka pa tenüng Kim ta dang shia lir aser iba dak sendakba nung shinga pua lir mali ibajia memetetdaktsü.
Sangdong ajanga ashiba agi, US aser parnoki sentong nung tsüngsanga anidakba linük, South Korea nungertemi kiralongratsü tasa asaba aser itdangiterba nokdangtsü asoshi North Korea-i tang nungi Korea yimya nung inyak tenzüktsü.
US Embassy, Seoul aser South Korea National Intelligence Service nati iba dak sendakba nung ano telangzüba kecha magütsü.
Taküm küm tetenzüklen, Pyongyang-i ‘chemical war agent VX’ amshia North Korea lenir tedi, Kim Jong nam Kuala Lumpur tayimtsü anenba tesem nung tepset, ta Seoul-i aitsüba ajanga US-i North Korea ji kiralongrar nem teyari agütsür linük tarensen rongi yok. Ajisüaka North Korea-i ibaji aitsüogo.
North Korea-i missile aika tendangba sülen hopta ishika tesem nung tensa kanga mejungi kümogo aser US Tir Donald Trump’er administration-i ibaji atema ola adokogo.
US-i Korea Peninsula tashi navy strike group yokogo aser ibaji ajanga Pyongyang kanga jashir, saka US ketdangsertemi, rara tapu ajak asoshi renema lir, ta shiogo.