India-i Pak. nunger manemer nem visa agütsütsü memulunger

Islamabad, May 6 (Agencies) : Pakistan nunger manemertem India-i arua temang tendanga yarirtem nem ita ana buba visa magütsür, ta Honibarnü osangbenertemi ashi.
Osang ajanga ashiba agi, iba telemtetba ajanga temsen, tezüngjang aser temulungjang tashidak agi shiranga aliba Pakistan nunger nisung meyirjang aika dak kongshir.
“India-i Pakistan nunger nem medical visa agütsütsüji tamakoktsü mapa ka kümdaktsüogo,” ta ketdangser kati ashi.
Ketdangser jagi ashiba agi, Pakistan-i Islamabad nung aliba India nunger ambassador, Gautam Bambawale jaoka iba tebilemtsü lemsatepogo.
Pakistan anema kiralongrar ajioktsüba aser rara tenzüktsü asoshi senotsü agi yarir ta tai tonglokja aser India nungi itdangiter ta shia, Kulbhushan Jadhav tasüba agi merenshitsü obendang agütsüba sülen nungi balaka India aser Pakistan na tsüngda tensa kanga mejungi küma tebilemtsü tuluba akümer.