Chhattisgarh nung CRPF tepseter nisung 9 apu

Raipur, May 6 (Agencies): Honibarnü Central Reserve Police Force (CRPF)-i Chhattisgarh kübok Chintalnar aser Chintagufa yimtsüngtem nungi nisung 9 shi puogo ta osang angazüker.
Taoba ita Sukma tesem nung Naxal temi CRPF jawan 25 tepsetba ken o dak sendakba nung nisungtemji apu. Sepaitemisa temulung melemi bilemer nisung 10 pua lir.
Chhattisgarh kübok Bastar district nung aliba Kukanar yimtsüng nung temulung melemi bilemertemji apu, ta Sukma Superintendent of Police, Abhishek Meena-i osangbener dang ashi.
Chhattisgarh police aser CRPF külemi bushisüngdanga aodang nisungtemji apu aser parnok ajak state police ket nung agütsüogo, ta osang ajanga ashi.
“Pua alirtem rongnung anabo PGLA züngsemtem lir ta bilemer. Bushisüngdangertemi iba kuliji bushitepdar” ta ketdangser kati osangbener dang ashi.
People’s Guerrilla Liberation Army(PGLA) ta CPI-Maoist indang telungpur telok lir aser Sukma nung Hidma ta ser nisung kati iba telok ketdangsüa repranger.
April 24, 2017 nü CRPF jawan tem Chintagufa tesemleni aodang Naxal temi amak aser iba mapang jawan 25 tashi khaset.
“Ozü sepai metsür pungu tashi taküm laluogo. Parnokji ‘road opening’ mapa inyakdang Naxal temi amak” ta CRPF Deputy Inspector General, M. Dinakaran-i ashi.
Naxal 300 shi kati CRPF nung 75th battalion sepaitem amak aser parnok rongnung tetsür teimba liasü, ta tenük kuli agütsürtemi shiogo.
Tang sepaitemi pua aliba nisungtem dang asüngdangya asüba ajanga osang tejangja metettsü.