Assam nung sorkar mapa inyakertemi sobaliba sübotsü sübor

Guwahati, May 6 (Agencies): Assam state sorkari parnok mapa inyakertem dang sobaliba sübotsü sübotsü shidangba sülen tanü Honibarnü state tesem balala nung sorkar mapa inyakertemi ‘dhoti-kurta’ aser ‘mekhela-chador’ sübor mapa inyakdaki aru.
Assam sorkari itashi mezüngbuba aser pezübuba Honibar anogotem sobaliba sübotsü agitsü tebilemba ka metetdakja liasü.
April 21, 2017 nü Civil Services Day sentong nung Assam chief secretary V K Pipersenia-i anir sorkar ketdangser aikati sobaliba sübotsü sübor aden aser iba sülen sobaliba sübotsü sübotsü tebilembaji lemsatep. Iba sentong nung Chief Minister Sarbananda Sonowal-a aden.
Iba anogo sülen Principal Secretary (Personnel), PK Borthakur-i Principal Secretary (General Administration), PK Tiwari dangi shidi ka nung, sobaliba sübotsü süboba atema inyakyim ka tenzüktsü asüngdang.
“Sobaliba sübotsü süboba ajanga sorkar ketdangsertem aser mapa inyakertem mapa talila inyaktsü jangradaktsür” ta Borthakur-i züluba shidi nung shia liasü.
Ajisüaka, iba tebilemba ya Sadou Asom Karmachari Parishad-ibo magizük. Parnoki ashiba agi, iba telemtetba ajanga sorkar mapa inyakertem tsüngda mangatettep adoktsü.
“Assam ama kin temeyoktep aika aliba state ka nung sobaliba sübotsü agitsü tetuyuba agütsüba ajanga mangatettep adoktsü. Assam nung telok balala indang sobaliba sübotsü balala lir aser kar indang sübotsübo mapa inyakdang asemtsü meputep lir. Talisa, iba tetuyuba ajanga sorkar mapa inyakertem tsüngda mepelatep adoktsü,” ta SAKP president Kalita-i metetdaktsü,
Külen, opposition telok Congress-ia iba tebilemba ya magizüker ta metetdaktsüogo. “Onük tongtipang aika atema inyaktsü lir. 2016 assembly elections mapang BJP aser parnok den yaritepertemi nübor tsüngdang nangzükbatem sorkari tama inyaktsüla” ta Congress MLA, Abdul Khaleque-i ashi.