Congress tanaben asentenshitsü: Antony

Thiruvananthapuram (Kerala), May 07 (Agencies): Deobarnü Congress Party lenir tain, A.K. Antony-i, taküm February-March mapang state pongu assembly elections nung party-i tamakok nguogo, ajisüaka Congress tanaben asentenshitsü, ta ashi.
Kerala yimtiba, Thiruvananathapuram nung sentong ka nung jembidang Anthony-i, “Tamakok angubaji khenpiga atema dang lir, kechiyong Congress Party tanaben asentenshitsü. Tang mapang ya tera nungi Congress asentenshitsü mapang ka lir,” ta ashi.
“Kerala nung lenirtem dak dang rangloker inyaker, saka tera nung party tashi mait. Iba ya melenshitsüla,” ta pai ashi.
Pai ashiba agi, tan ita küm ka ajungtsü aliba Left sorkari lenla ajaklen tamakok nguogo.
“State nung sector ajaklen teraksa lir,” ta taoba mapang Kerala Chief Minister, Anthony-isa ashi.
Congress leniri, Kerala nung ruling party, Communist Party of India-Marxist (CPI-M)-i Congress Tir, Sonia Gandhi nem tenüngsang agütsütsü menoa mali, ta ashi.
“West Bengal, Tripura aser tanga tesemtem nungi lenirtemi Sonia dang lenir asütsü (opposition anitsü) asüngdangogo. Tanü mesüra tarutsü nung Kerala nung CPI-M-ia kasaji inyaktsü,” ta pai ashi.
Paisa, opposition party tem telongjemji taküm July ita nung Tir election agidang jungkai adoktsü, ta shisem.