George Michael den meimtepsangi temsepba mozü metsümeshidak inoktsü

London, May 7 (Agencies) : Kentener asür, George Michael temesepba mozü achiba anendaktsütsü teimla nung pa den tesüiba mapang meimtepa alisang, Kenny Goss-i kentensang achitsü ayuba temesepba mozütem metsümeshidak tzü agisa inzüka yok.
Arishi küm 58 tain, Kenny Goss aser ‘Careless whisper’ ken kanga nüngtugu küma tentetsang, George Michael na ya 1996 nungi 2011 tashi medema liasü aser iba mapang Goss-i George temesepba mozü achiba yimya anendaktsütsü asoshi item temesepba mozütemji metsümeshidak ongkenisa inzüka yok, ta osangbenertemi ashi.
“Ni intoktsü nungbo joko mangutsü ta bilema, ni pa achitsü yua aliba temesepba mozütemji bushia metsümeshidak intoktsü. Pa amatari kanga tebulu liasü anungji ni intoktsüba mozüji pasasa sama asütsü akok ta pai bilem,” ta Goss-i osangbenertem dang ashi.
“George-i pa yamai kara asütsü mebilem asütsü amai ni bilemer, ajisüaka ni pa tenük nung rangit shia, aya Tsüngrem ni na magishitsü, tasa bilem. Khen mapang kabo pai anogo nung ganja 25 ben tashi achitsü tenzük. Ni pa ganja achiba nguogo saka tanga temesepba mozü tesashibo machi,” ta Goss-i shisem.
Pai, George-i par tembar aser kibongbo kümzüka ayu aser pai ganja ji medemer tangartem den angsa achi, ta ashi.
“Ni pa ibala temesepba mozü achiba kanga nokdangba ajanga pa meseper aliba mapang ni anasa maru mesüra ni anasa machi. Pai temesepba mozüji medemer tangar kar den angsa achi….ni pa dang asüngdang dang pai kodanga teyazü masü mesüra tatoka memeshi. Pai ni yi ajemba nokdanga liasü kechiba süra kü dak timtem ka adok,” ta paisa ashi.