Assam Accord akhümtsübuang: APCC

Guwahati, May 7 (Agencies): Honibarnü Assam Pradesh Congress Committee (APCC)-i Tir, Pranab Mukherjee aser Union home minister, Rajnath Singh den ajurutepa Assam Accord mapa küma inyaktsü asoshi Centre-i tebang aitsüla ta takhangba agütsü.
APCC president Ripun Bora-i anir APCC teshimtet telok nung Congress MLA aser MP tem liasü aser parnoki Pranab aser Rajnath na dang ozüng alema arurtem jangjatsü atema anogoji March 25, 1971 asütsüla, ta mepishia metetdaktsüogo.
Assam nung indigenous telok aikati ozüng alema arurtem jangjatsü anogoji 1951 küm süang ta takhangba agütsür.
“Onoki Tir dang mepishiogo. Anogo melenshira Assam nung mepetmesü tulu adoktsü. March 25, 1971 ya ajaki mulunga agizük, anungji iba anogo memelenshitsüla. Centre-i Supreme Court nung Assam Accord kümzüktsüla” ta Bora-i osangbener dang ashi.
“Tir-ia iba onük asoshi shisadangtsü nangzükogo.” ta paisa shisem.
APCC president, Bora-isa ashiba agi, “NRC update maparen tekaratiba nung tembangtsü atema onoki sorkar dang ashitsü. Bendanger dang nungi state nung alirtem kümzüka ayutsübaji NRC dang lir. NRC nung panchayat secretary indang certificate agizüktsü atema Centre-i Supreme Court nung tokteptsüla. Aji ta mesüra tetsür lakh 40 shi timtem ajurutsü.”